Portada Turismu Uviéu faise protagonista en Fitur del entamu’l Camín de Santiago y del quesu

Uviéu faise protagonista en Fitur del entamu’l Camín de Santiago y del quesu

by redacción asturnews

L’Alcalde, Alfredo Canteli, inauguró esta selmana’l stand d’Uviéu na Feria Internacional de Turismu, Fitur, nun actu al qu’asistió’l conceyal de Turismu, Hostelería y  Congresos, Alfredo García Quintana, y que cuntó cola presencia de distintes autoridaes ente les que destacaba l’embaxador de la Federación Rusa n’España, Yuri Korchagin o Yago Picu de Coaña, embaxador d’España n’Austria.

Con esti actu institucional, el Conceyu d’Uviéu punxo en marcha tou les actividaes que los visitantes al stand van poder esfrutar mientres los próximos díes. Hasta’l vienres va ser la vez pa los profesionales del sector turísticu, un sector clave na estratexa marcada pol Consistoriu uvieín,  ente que’l sábadu y el domingu va ser el públicu xeneral quien afaye’l potencial que la capital del Principáu llevó a la feria.

Les actividaes en redol a Uviéu como Orixe del Camín de Santiago, la temporada d’Ópera y de Zarzuela, la programación deportiva, festiva y cultural, y el International Cheese Festival que va allugar la ciudá nel mes de payares suponen l’apueste uvieín nesta nueva edición d’esta feria de turismu, considerada la más importante del mundu.

Mientres la so intervención, na que tuvo bien presente’l papel qu’Uviéu xuega nel Orixe del Camín de Santiago, el rexidor uvieín destacó que, col stand propiu col que’l conceyu cunta nesta edición de Fitur, “demuéstrase qu’Uviéu apuesta fuerte, y ensin complexos, pol sector turísticu”. Canteli, amás, quixo significar que “la pandemia reafitó la necesidá de convertir al turismu uvieín nun motor elemental pa la recuperación y reactivación económica pal conceyu” pa siguir asegurando que “la hostelería, la hotelería, el comerciu y la cultura de la ciudá merecen esta oportunidá”. L’estensu patrimoniu cultural uvieín marcó tamién les palabres del alcalde, que remató convidando a los asistentes al actu a visitar Uviéu “porque nun hai meyor manera de conocer una ciudá que pasiala, sentila y esfrutala”.

Tamién te podria gustar