Dixebra apuesta pol metal-rap y el reggae nel so nuevu discu, que tará nel mercáu en mayu

Metal-rap y reggae inspiraos polos soníos contundentes de Red Hot Chili Peppers y Race Against the Machine. Asina sonará’l nuevu discu de Dixebra, que tará nel mercáu en tornu al mes de mayu y cuya grabación acércase al ecuador de los temes previstos nos Estudios Tutu de Corvera. La banda avilesina, que cellebra los sos 18 años n’escena, busca impregnar tolos temes del nuevu trabayu con un soníu común ya identificativu.

En total, el grupu, únicu referente durable de la música rock en llingua asturiana, tien yá prácticamente completaos ocho temes que yá tán grabaos a la espera namás de que se-yos añadan les melodíes de gaita y los arreglos de vientos. A diferencia de trabayos anteriores, Dixebra optó nesta ocasión por ‘cocinar’ con más calma el que va ser l’octavu cd de la banda, centrando la grabación nos estudios rexentaos en Corvera pol técnicu de soníu’l grupu, Sergio Rodríguez, y espaciando los procesos de rexistru y mezcla final.

Con esi plantegamientu, los integrantes de Dixebra prevén completar la grabación del nuevu discu nes caberes selmanes de marzu, col envís de poder presentar en directu los temes del trabayu nel mes de mayu. La banda entaína agora, poro, los trabayos finales de composición y d’acoplamientu de lletres, dientro d’un procesu de creación que culminará nunes 17 canciones de les qu’a la fin saldrá la esbilla definitiva.

Según precisó’l vocalista y cofundador de la banda, Xune Elipe, el grupu decidirá depués qué facer colos ‘descartes’ y una de les posibilidaes más viables sedrá almacenar esos temes yá grabaos y nun escoyíos pa incluyilos en futuros discos recopilatorios.

L’últimu discu con temes de nueva creación que Dixebra sacó al mercáu, ‘Sube la marea’, ellaboróse na primavera de 2002 nos estudios guipuzcoanos Gárate. Dende entós, la banda fizo una única nueva incursión na edición discográfica, a finales de 2003, col asoleyamientu’l llibru-discu ‘Cróniques d’un pueblu’, qu’axuntaba remasterizaciones de temes anteriores y un testu cola hestoria’l grupu firmáu pol periodista Francisco Álvarez.

Web oficial de Dixebra