Cultura anuncia un plan pa rellanzar la Filmoteca Española

El nuevu secretariu d’Estáu de Cultura, Fernando Benzo, axuntóse la selmana pasada con una amplia representación de los trabayadores de la Filmoteca Española, a quien tresmitió la so intención de diseñar coles sos aportaciones “un plan específicu que sirva pa poner en valor” esti centru nel curtiu y mediu plazu.

Asina lo informa nuna nota de la secretaría d’Estáu de Cultura, depués de que los sos máximos responsables moviéranse’l vienres hasta la see de Filmoteca Española, nel Palaciu del Marqués Perales, pa intercambiar idees col personal del centru que dexen diseñar un plan específicu basáu en “fomentar l’actividá y espardimientu de la Filmoteca”.

Benzo aseguró a los trabayadores que “impulsar la Filmoteca” ye una de les sos prioridaes de trabayu; nesi sentíu, estimó la so profesionalidá y anunció un plan que se va realizar “cuntando coles aportaciones del propiu personal de la Filmoteca, que gocia d’una alta capacidá técnica y una peramplia conocencia del mundu del cine nel so conxuntu”. Les llínees xenerales d’actuación, que van ser recoyíes nel Plan Cultura 2020, van tener como oxetivu principal fomentar l’actividá y conocencia d’esti arquivu.

En septiembre de 2015, la Filmoteca Española saltó a la prensa non pola so programación sinón por una plaga de chinches qu’obligó a cerrar la sala principal del Cine Doré. Fai tan solo unos díes, l’arquivu que curia’l patrimoniu fílmico español volvió tar n’entredichu, nesta ocasión, por delles denuncies que sollertaben d’un presuntu intentu d’esmantelamientu del organismu, estremu que’l Ministeriu de Cultura desmintió.