Portada Convocatories Convoquen la segunda edición del Premiu “Asturies” d’Ensayu

Convoquen la segunda edición del Premiu “Asturies” d’Ensayu

by asturnet

Col enfotu de da-y puxu al estudiu de la realidá política, económica, social y cultural d’Asturies, asina como al so pensamientu, la editorial Espublizastur vien de convocar la segunda edición del Premiu “Asturies” d’Ensayu pa obres escrites n’asturianu. El premiu d’esta segunda edición ta dotáu con 1.700 euros (1.450 en metálicu y 300 en llibros) y la espublización de la obra premiada.

El plazu pa presentar los ensayos ye hasta l’1 de payares tando’l xuráu d’esta edición compuestu pol economista y escritor David M. Rivas, Antón Fuertes, psicólogu y escritor cofundador del Conceyu d’Asturies en Madrid, Bruno Gómez ganador de la primer edición con “Turismu ya identidá Nacional”, l’escritor Xaviel Vilareyo que recibió una mención del xuráu na primer edición, y Javier Cubero, Premiu Fierro Botas d’Ensayu y Investigación 2009.

Les obres que se presenten al “2u Premiu d’Ensayu ASTURIES” tendrán que versar alrodiu la realidá política, económica, social y cultural d’Asturies –nos sos territorios hestóricos- y los sos retos de futuru. Valoraránse especialmente obres que combinen la esposición teórica, la so aplicación práutica y la so exemplificación al traviés de comparatives con otres realidaes nacionales.

Les obres tendrán de ser estrictamente inédites y nun podran tar premiaes anteriormente, escrites n’asturianu, con una estensión d’ente 120.000 y 240.000 carácteres. La resolución del premiu fadráse pública’l 7 de payares.

Los orixinales han mandase, pel sistema de pliques, a ESPUBLIZASTUR La Caleya’l Ríu, 205 CP 33394, Xixón, Asturies. Han mandase cinco copies, axuntándose una copia en formatu dixital del orixinal.

Tamién te podria gustar