Cerezal Music esparde per Asturies la presentación de “Camín”

El grupu asturianu Cerezal Music fai anuncia de 3 presentaciones en formatu acústicu del só nuevu discu “Camín” pa despedir la primavera y dar la bienvenía al branu. Nelles, xuniráse música, pintura y l’ambiente de chigre. En andecha col artista plásticu Miguel González Díaz (Cualloto, 1978), idearon un orixinal formatu de direuto, nel que ambos llinguaxes, el musical y el pictóricu, manifiéstense y comuníquense en tiempu real. El resultáo ye, más allá d’un conciertu, una experiencia sensorial pa l’espectador.

Prometen que caún de los conciertos va ser únicu y dixebrao del restu, cola elaboración de nueves obres pictóriques y dixebráes igües musicales de la banda. Pa les presentaciones, elixieron llugares emblemáticos de la música en direuto, entamando el prósimu 30 de mayu n’el Sabil (Santu Adriano), nel entorno de la Senda l’Osu, pa acercase dempués a Uviéu (5 de xunu, “L’Esperteyu”) y Xixón (27 de xunu, “La Vida Alegre”). La entrada a tolos conciertos ye de baldre.

“Camín”, galardonáu na última edición de los Premios AMAS como meyor discu folk de l’añu, lleva dientro 12 cortes y ún Bonus track, principalmente composiciones del grupu y también igües de temas de la tradición oral d’Asturies. Folk, pop, jazz y rock mécense nel soníu d’esta banda, qu’esti branu va tar en cartelos emblemáticos a nivel internacional, como la Foguera de San Xuan en Poniente o el Festival Intercélticu de Lorient, na Bretaña francesa.