Carlos Rubiera saca al mercáu un discu nuevu con doce “Asturianaes”

El cantautor Carlos Rubiera ta acabante d’asoleyar un discu nuevu, “Asturianaes”, un proyeutu musical nel que lleva munchos meses trabayando y nel qu’axunta doce tonaes, seis tradiciones y seis de creación propia, que van suponer “una auténtica renovación del xéneru”. L’actu tuvo llugar nos llocales de la Sociedá Xeneral d’Autores y Editores, n’Uviéu.

Nel discu, asoleyáu por Producciones La Capitana, apaecen doce temes acompañaos por pianu y otros ritmos del nuevu folk. Amás, n’Asturianes, Carlos Rubiera cunta cola participación de trés grandes de la música asturiana, la cantante Mariluz Cristobal Caunedo y los gaiteros Xuaco Amieva y José Ángel Hevia. Unes collaboraciones de lluxu que faen que’l CD apaeza precedíu d’una espectación importante.

El músicu xixonés ye ún de los hestóricos miembros del llamáu Nueu Canciu Astur, que entamó a garrar puxu nos primeros años de la transición, a mou d’otros movimientos asemeyaos que se dieron n’otres nacionalidaes del estáu, como la Nova Canço Catalana. Tamién formó parte de la organización Conceyu Bable en Xixón, dende la qu’empezó a trabayar pola recuperación llingüística del asturianu. Ye miembru activu de l’Academia de la Llingua Asturiana y l’añu pasáu espublizaba’l so discu últimu hasta agora, “Canciones de Xixón”, onde axuntaba temes nuevos y versiones de los sos yá clásicos sobre la villa de Xovellanos.