Portada Música Avilés entama’l Festival Fifty-Fifty de Jazz y Poesía con más de 70 artistes

Avilés entama’l Festival Fifty-Fifty de Jazz y Poesía con más de 70 artistes

by redacción asturnews

Avilés pon en marcha’l Fifty-Fifty Jazz & Poetry Festival (FFF). Un eventu creáu cola fin d’ufiertar la ciudá como una plataforma d’espardimientu, diversión y alcuentru ente’l públicu y más de 70 artistes consagraos y emerxentes del jazz y los sos derivaos y de la poesía. Una propuesta única n’España, que va tener llugar del 18 al 21 de payares con un ventena d’actividaes previstes.

Promovíu pola Asociación Cultural Fifty-Fifty, nacida mientres el confinamientu, tiempu nel que se xestó la idega de la puesta en marcha del certame, ya integrada por Yvan Corbat, Alfonso Martínez Tuñón “Fonky”, Sergio Suárez Fernández “Curry” y Gonzalo Suárez Fernández “Chalo”, foi presentáu esta selmana pasada pola conceyala de Cultura y Promoción de Ciudá d’Avilés, Yolanda Alonso, acompañada por 3 de los fundadores de l’Asociación.

Destacó Alonso lo novedoso de “una actividá que dexa programar un tipu de música non habitual n’Avilés, como ye’l jazz, y en converxencia con una de les parceles lliteraries más puxantes na actualidá, y de la que la ciudá nun ye ayena, como ye la poesía”.

“Coles mesmes -añedió-, escoyóse una fecha que dexa complementase, ensin triase, con otros grandes eventos que se celebren n’Avilés, como’l Celsius o les Xornaes del Cómic, y n’Asturies, como’l Festival de Cine de Xixón o los Premios Princesa. Amás, quier sofitar al sector de la hostelería, tan tocáu mientres la pandemia, al entamase en temporada baxa, dexando desestacionalizar les visites a la ciudá”.

Dende’l nome, el festival supon una declaración d’intenciones, cuidando que se marca unos oxetivos de paridá y participación ente homes y muyeres, convirtiéndose nun referente européu en materia de bones práctiques de programación n’igualdá de xéneru.

Pero tamién dende la perspectiva artística, con un cincuenta per cientu dedicáu al jazz y a la música, y otru cincuenta a les manifestaciones poétiques. Según al espaciu p’artistes consagraos y emerxentes, nacionales ya internacionales.

Más información

Tamién te podria gustar