Aurelio Suárez nel Muséu de Belles Artes d’Asturies

Hasta’l 23 de xineru puede visitase nel Muséu de Belles Artes d’Asturies, asitiáu n’Uviéu, una esposición dedica al pintor Aurelio Suárez.

La colección del Muséu, que s’empecipió con dos obres procedentes de l’antigua Diputación Provincial, foi axuntada de 1981 a 1999 ya inclúi 9 olios, 8 gouaches y 3 bocetos sueltos, amás d’un álbum enllibráu en pergamín qu’axunta otros 10 bocetos, 2 ceres y 2 olios. Completa la colección un platu de lloza, como amuesa del trabayu del artista como pintor ceramista.

Aurelio Suárez (1910-2003), empezó a pintar na so villa natal, formándose como artista nel Madrid de los años trenta, en contactu cola renovación qu’entós se producía na pintura de tol estáu. Calteniendo siempres el mesmu tamañu, conformaba series constituyíes por un númberu y xuníes por un averamientu temáticu y estilísticu común. Amás d’estos trabayos al oliu fai tamién aguazos sobre papel, en formatu asemeyáu y, en menores dimensiones, lo que denoma bocetos, tamién sobre papel, que prepara en series de cien. En toes estes obres arrama una inspiración bien personal sirvida por una trabayada técnica pictórica, onde les graduaciones de color apaecen rigorosamente midíes, nuna orientación artística de fonda individualidá ensin paralelu nel panorama estatal de los últimos decenios del sieglu XX.