Asturies diz adiós al músicu David Mateos “Puru”

El mundu cultural asturianu ta de llutu pola muerte de David Mateos “Puru”, percusionista del grupu ribeseyanu Corquiéu, amás de pilotu de ralis y hosteleru comprometíu cola cultura asturiana dende’l so Chigre’l Corquiéu en Ribeseya. El miércoles pasáu sufría un accidente col coche que lu dexaba quemáu nun 90% del cuerpu. Anque consiguió escapar de les llames y lu treslladaron al Hospital Central d’Asturies nun foi a superar les graves feríes. Morría’l sábadu en Madrid, dempués de que lu treslladaren al Hospital de La Paz nun últimu intentu por salvalu, que nun tuvo ésitu.

Esti domingu cientos de persones despidiéronlu nun funeral celebráu nel so conceyu, onde la Banda de Gaites de Ribeseya, na qu’entamó la so carrera musical, -y fizo un homenaxe caberu.

David Mateos “Puru” tenía 32 años nel momento de la so muerte y llevaba tola vida dedicáu a la música folk y l’automovilismu, les sos grandes pasiones. El so perfil en Facebook, y la páxina del Chigre’l Corquiéu convirtiéronse n’improvisaos espacios d’homaxena d’amigos y conocíos que dende tolos requexos del país-y ficieron llegar el so recuerdu.