Arte pola oficialidá na Casa Cultura de Colunga

La Casa Cultura de Colunga, cola collaboración del Serviciu de Normalización Llingüística de la Comarca de la Sidra, acueye hasta esti llunes 30 d’agostu, la V Amuesa d’Artistes Asturianos pola Oficialidá del Asturianu, cedida pol Conceyu Abiertu pola Oficialidá (CAO). Una esposición que va más allá del so interés artísticu. Ye un posicionamientu de los artistes asturianos a favor de los drechos llingüísticos. Les persones que participan tán pola llabor de que se reconozca la oficialidá del asturianu y gallego-asturianu como un drechu ciudadanu básicu: la posibilidá llegal d’usar la llingua propia en cualesquier ámbitu de la vida.

Son una parte más de la sociedá civil que ve con bonos güeyos la recuperación y normalización del patrimoniu llingüísticu d´Asturies. Les artes y la cultura conviden d´esta miente a la sociedá asturiana a que tome conciencia de la urgencia de resolver esta cuestión d´una manera tranquila y consensuada. Ye una ocasión pa conocer obres del arte actual y reflexonar sobre la situación del problema llingüísticu n’Asturies.

L’amuesa axunta artistes de toles tendencies y edaes que, como espresión de compromisu donen estes obres al CAO p’ayudar nes sos campañes de reivindicación. La esposición ta coordinada pol Foru Arte Ciudá que participa nel CAO ente más de 250 asociaciones civiles.

Cuenta con obres de artistes tales como Fernando Alba, Berto Peña, nel Amaro, Maite Mentol, Charo Cimas, Beatriz Corredoira, Pablo Maojo, Alejandro Mieres, Ricardo Mojardín, Neto, Ánxel Nava, Ástur Paredes, Vicente Pastor, Bernardo Sanjurjo, Cuco Suárez, Guillermo Simón, etc.