Apruébase l’ampliación del Muséu de Belles Artes

La execución de l’ampliación durará dos años y tendrá un coste de 17.4 millones d’euros. El proyectu va tar diseñáu por Patxi Mangado que lu va presentar nun plazu de cuatro meses. La constructora de capital públicu Sedes algamó la concesión del proyectu mediante una ufierta que rebaxaba en 10,6 millones d’euros el presupuestu de llicitación.

El Conseyu de Gobiernu d’esti xueves aprobó la decisión de la mesa de contratación. La decisión adoptada pola Conseyería de Cultura nun cuntó cola opinión del director del Muséu, Emilio Marcos Vallaure, que nun participó na Comisión Evaluadora de los Proyectos por nun ta convidáu a la mesma.
La Conseyera de Cultura, Ana Rosa Migoya, subrayó la importancia de que l’ediciu del Muséu tenga una entrada dende la plaza de la Catedral. Actualmente’l Muséu de Belles Artes ocupa tres edificios, el Palacio de Velarde y los números de la cai de La Rua 10 y 12. Mediante l’ampliación el muséu doblará la so estensión y podrá dar sitiu a más espacios pa la colección permanente, asina como sales pa esposiciones temporales o una cafetería.

La colección del Muséu de Belles Artes d’Asturies ta compuesta por alredor de 10.000 pieces y tien amuesaes unes 300. Ente les obres más señalaes figuren un Picaso, una gran colección de los diferentes autores asturianos, o l’Apostoláu d’El Greco.