Ángela Vallina pide un plan específicu d’emplegu xuvenil pa evitar la sangría de la emigración de la mocedá asturiana

La candidata asturiana d’IX nes llistes al Parlamentu Européu, Ángela Vallina, reclamó güei un plan européu d’emplegu xuvenil, una iniciativa que tien de parar la sangría que, dende l’empiezu de la crisis, supunxo la salida de más de 30.000 mozos y moces d’Asturies. “Les polítiques de retayos son un fracasu estrueldosu y ye indispensable un cambéu d’aldu, n’España, en concencia, pero tamién n’Europa. Arrebola escuchar a socialistes y populares echándose la culpa cuando dambos son responsables, pos son ellos quien gobernaron Europa y España, llegando a alcuerdos que son los que precarizaron especialmente a la mocedá.

L’emplegu xuvenil foi n’España una de les asignatures pindies, inclusive antes de la crisis, yá qu’esistía un paru estructural superior al de la media europea. Agora, la falta d’oportunidaes d’emplegu, xunto colos problemes que traviesen les families y los retayos en beques y aumentu de les tases xeneró’l caldu de cultivu aparente pa una esplosión del desemplegu y l’emigración. “Si equí nun pueden trabayar, porque naide-yos ufiérta un emplegu; nun pueden estudiar y formase, porque los nuevos modelos clasistes del PP torguenlo con menos beques, nun-yos queda otra qu’emigrar. Nun son lleendes urbanes, son, lamentablemente, realidaes, urbanes y rurales”.