Alejandro Zapico protagoniza otra sesión d’Asemeyar esti xueves

El próximu xueves, día 21 de noviembre, a les 20H.00’, nel local social del Atenéu Obreru de Xixón (Cl Cuadonga, 7 – 1o Izda.), va tener llugar una nueva sesión de Asemeyar. Nesta ocasión cuntamos cola presencia del fotógrafu Alejandro Zapico.

El ciclu Asemeyar, de calter periódicu, consiste en qu’un fotógrafu de reconocíu prestíu proyeute’l so trabayu a los asistentes al empar que va esplicando los rellabicos del mesmu. Nes anteriores sesiones cuntamos cola presencia de García de Marina y Julio Herrera. Llueu va visitanos el premiu Pulitzer Manu Brabo.

Asemeyar ye una actividá entamada pol Atenéu Obreru de Xixón en collaboración con Fotohof – Asturies. Alejandro Zapico empieza’l so trabayu como fotoperiodista nel añu 2003 cubriendo les guerres d’Afganistán ya Iraq pa medios pertenecientes al Grupu Corréu y pa l’Axencia mexicana Notimex. Dende entós el so trabayu como fotoperiodista caracterizóse por un altu compromisu social y n’especial coles causes de quien más sufren.

Son munches les ONGD coles que collaboró pal espardimientu de les sos actividaes y les problemátiques qu’intenten solucionar, ente les que destaquen Médicos Ensin Fronteres, Amnistía Internacional, UNICEF, Asociación d’Amistá col Pueblu Saharagüi, Asociación pal Desenvolvimientu y l’Acción Social Solidaria, distintos colectivos sindicales y movimientos sociales alternativos.

Les sos fotografíes fueron publicaes per medios nacionales como’l diariu El País, el dominical El Magacín, La Nueva España, El Comerciu, Diagonal, La Voz d’Asturies ya internacionales como La Xornada de México o Legendmagazine. Nel añu 2006 l’Institutu de la Mocedá d’España premió’l so trabayu audiovisual sobre les bandes guatemaltecas (Les Maras: La Vida y la Muerte pintada na Piel). Esi mesmu añu tamién recibió’l premiu de fotografía, nel so apartáu d’inmigración, de l’Asociación Asturies Acueye. En 2010 recibe’l premiu de la Ongd VOLS a la meyor semeya social. Mientres ocho años collaboró na organización de los Alcuentros Internacionales de Fotoperiodismo “Ciudad de Xixón” empobinaos pol Pulitzer Javier Bauluz.