Una nueche de “ROXURA”, nuevu estrenu nacional pa reabrir el Palacio Valdés

Una nueche de “ROXURA”, la propuesta escénica cola que, en doble sesión tornen les funciones al Teatru Palacio Valdés va ser un estrenu absolutu nacional, sobro un testu escritu ya interpretáu por Julián Ortega, al pie de Gloria Muñoz y empobináu por Dan Jemmett. L’estrenu va ser esti xueves y vienres, 17 y 18 d’avientu, en escenAvilés a les 20.15 hores.

El cacu al que quita la vida Dolores ye esa llocada yera un lladrón de bancu que venía avisala del so inminente desahuciu. El fíu al que llama, un policía antidisturbios qu’a otru día diba recibir un esperáu ascensu. Un situación de suspense, d’humor negro nel que madre y renuevu vense obligaos a una fuxida escontra alantre.

Como esplica l’autor, Julián Ortega, que comparte escena cola so madre ficticia, y al empar la so proxenitora na vida real, Gloria Muñoz, “ROXURA esplega n’escena la relación entre una madre y un fíu nun momentu crucial de les sos vides nel que nun hai tiempu para pensar, namá puede actuase. La traxedia apálpase, sicasí los sos protagonistes, cabileños hasta l’almaresía, van de cabeza a la comedia”.

La dirección nesta producción de Lazona cuerre al cargu d’unu los directores con mayor prestíu d’Europa, el británicu Dan Jemmett. Un nuevu estrenu absolutu para’l centenariu Palaciu Valdés, xuna propuesta que conduz a “una risa de perplexidá”, en palabres del propiu Ortega.

Los protagonistes, Ortega y Muñoz, que yá amosaron n’otres ocasiones la so complicidá y saber faer n’escena, como fixeren apocayá en “Mestiza”, a les ordes de Yayo Cáceres, llucharán por evitar el tráxicu destín.

Con “ROXURA”, que’l so estrenu inicial taba previstu’l pasáu mes d’abril y viose afectáu pola suspensión de les actividaes culturales presenciales por causa de la pandemia del COVID-19, retómense les representaciones nel Teatru Palacio Valdés, tres el llevantamientu de les últimes restricciones sanitaries per parte del Gobiernu d’Asturies.

Asina, la función caltien les feches previstes dientro de la programación d’ochobre a avientu de escenAvilés, que tuvo que suspender nel teatru delles producciones como “Mariana Pineda”, “Castelvines y Monteses”, “Lope y les sos Doroteas” y “Dribbling”, para les que se busca nueva fecha.

Más información