Uviéu retoma RADAR los domingos nel Filarmónica

La programación cinematográfica de la Fundación Municipal de Cultura d’Uviéu, dirixida por José Luis Costillas, tornó’l domingu al Teatru Filarmónica, tres la interrupción del ciclu RADAR pola crisis sanitaria de la COVID-19. La cartelera que se programa na capital asturiana sol sellu SACO tornó’l domingu con Barruntu, con doble pase y seguirá los domingos vinientes.

RADAR sigue siendo gratuitu, pero’l públicu tendrá de retirar les invitaciones en https://entraes.oviedo.es/ dende les 12:00 hores del día anterior a cada sesión. P’aportar a la Filarmónica, el públicu tendrá de presentar tantu la entrada como’l so DNI. Amás, ye obligatoriu l’usu de mázcaru mientres la sesión. Con esta fórmula, la programación cinematográfica d’Uviéu cumple coles midíes de seguridá establecíes poles autoridaes sanitaries.

N’avientu, el públicu de RADAR va poder esfrutar de los títulos del ciclu dedicáu a Alfred Hitchcock: depués de Barruntu y Encadenaos (20); Parking (17), película rodada en parte en Candás y que forma parte del Ciclu de Cine Rumanu, realizáu en collaboración col Institutu de Cultura Rumanu de Madrid. RADAR va cerrar l’añu con Plácido (27), de Luis García Berlanga, xuniéndose asina al homenaxe que se preparar pol centenariu de la so nacencia, que se va cumplir en 2021. Esta allocada sátira con fonderada navidiega ta coescrita pol xenial Rafael Azcona y protagonizada por nomes imprescindibles del cine español como José Luis López Vázquez, Elvira Quintilla, Julia Caba Alba, Amparo Soler Lleal, Manuel Alexandre y Luis Ciges.

Les midíes adoptaes pol Gobiernu del Principáu d’Asturies pa contener la segunda fola de la epidemia de covid-19 obligó a los museos a cerrar les sos puertes dende principios de payares, colo que’l públicu nun pudo visitar los dos propuestes artístiques estrenaes na sesta edición de la Selmana del Audiovisual Contemporaneu d’Uviéu (SACU) espuestes nel Muséu de Belles Artes d’Asturies y nel Muséu Arqueolóxicu d’Asturies. Una vegada que dambes entidaes abrieron les sos puertes de nuevu, puede volvese a esfrutar d’El soníu del arte vol. 2 nel Belles Artes hasta’l 31 de xineru de 2021. Y, pela so parte, Planu sonoru vol. 1 va siguir nel Arqueolóxicu hasta mediaos del próximu mes.