“Les humanidaes celebren los 400 años de la Universidá d’Uviéu” na Facultá de Xeografía y Hestoria

Ayeri entamaron na Facultá de Xeografía y Hestoria de la Universidá d’Uviéu la XVI Selmana Cultural, qu’esti añu ta centrada nos cuatrocientos años de la universidá asturiana, cuntando cola presencia de dellos actos nos que la llingua asturiana va ser protagonista, como la presentación del ensayu sobre 1808 de Faustino Zapico y un alderique sobre revistes n’asturianu nel que van participar los responsables de les revistes “N’ast, cartafueyos d’ensayu” y “Formientu”, de lliteratura moza.

Los actos de güei van entamar a les doce la mañana nel Salón d’Actos de la Facultá de Xeografía y Hestoria, llugar de celebración de tolos actos, cola comunicación “Cultura y economía na Asturies d’entamos del sieglu XVIII”, por Álvaro Ruiz de la Peña y Joaquín Ocampo. A la una la tarde va celebrase un “Conciertu barrocu alredor de 1708” pol grupu Forma Antiqva.

El miércoles a doce la tarde Faustino Zapico va falar de l’Asturies de 1808, de la que ta acabante espublizar un ensayu cola editorial Trabe. Darréu, a la una la tarde, “La guitarra romántica: los maestros del sieglu XIX” va tar al cargu de José Antonio García Fuertes.

Pal xueves los actos van entamar a les 12 con una mesa redonda-presentación de les revistes Formientu, de lliteratura moza n’asturianu y N’ast, d’ensayu na mesma llingua. Nel actu van tar presentes los directores de les publicaciones, Inaciu Galán y Xabel de Cea respectivamente, amás d’un representante de la Comisión de Cultura de la Facultá de Xeografía y Hestoria, Javier Cuberu. L’actu va incluyir un pequeñu recital poéticu. Darréu, p’hacia la una la tarde, van entregase los premios naranxa y llimón a los profesores. A les dos los actos van completase con una espicha.

Los actos van siguir la selmana que vien, de llunes a miércoles y complétense con delles esposiciones.

Programa completu de la XVI Selmana Cultural