“Poemes de carambelu” ye’l nuevu discu del dúu Mestura

El grupu Mestura, formáu por Marisa López Diz como voz y Luis Suárez a les guitarres, acústica y voz, ta acabante de sacar a la venta un discu nuevu, “Poemes de carambelu”, un trabayu inspiráu nel llibru del mesmu títulu que sacara hai un tiempu López Diz.

El discu, editáu por Pintar Pintar, ta producíu por Mento Hevia, que tamién collabora tocando’l baxu, la percusión y los sintetizadores. Marta Rodríguez foi, pela so parte, la encargada del acordión.

Mestura sacara en 2006 el discu “Agua del norte”, un trabayu onde alternaben testos n’asturianu con otros en castellán, portugués o gallego-asturianu. Les lletres d’esti últimu tan, por embargu, namás n’asturianu y empobinaos al públicu infantil.