Xornada Feminista en L’Entregu esta fin de selmana

Esti sábadu 24 de febreru’l colectivu feminista Acción Aquelarre y el Centru Social Autoxestionáu La Semiente entamen una Xornada Feminista en L’Entregu caleciendo motores pal 8 de marzu, Día Internacional de la Muyer Trabayadora.

Trátase d’una xornada d’información, alderique, confraternización, reivindicación y festividá. Les actividaes van ser dientro del propiu Centru Social La Semiente y van entamar a les 12:30 hores cola presentación del últimu númberu de la publicación feminista La Madeja, que recibe’l nome de Sexualidades. Nesti númberu de la revista –quiciabes más que n’otros, quiciabes como en toos– vemos la cara y l’aviesu de la sexualidá dialogando, enfrentándose de distintes maneres, con palabres que se nota que remueven a quien les escribe y, de xuru tamién, a quien les llee. Son munches les voces que resonen en cada unu de los testos, como si de dalguna forma amosárense les duldes y los aprendizaxes, siempres en construcción, y s’espurriera la mano col deséu d’atopar puntos de sofitu y reconocencia nes otres.

Dempués, va haber tiempu para tomar daqué y participar de la “Xinta Popular” una comida de confraternización que va dar pasu a les 17:00 hores al documental “Él nunca me pegó”, con una posterior mesa redonda sobro la violencia machista non-física.

A les 19:30 hores y yá fuera del centru social, un pasacalles bien visual va salir dende les columnes del Parque La Llaguna col lema “ A pola Fuelga Xeneral Feminista”, col que quier reivindicase la participación activa dientro de la fuelga internacional feminista prevista en distintos países pal día 8 de Marzu. Dende Acción Aquelarre y La Semiente queremos denunciar con esta movilización non yá la violencia machista, sinón tamién plantegar que vamos parar: nel trabayu, pa denunciar que la división sexual del trabayu conderga a les muyeres a la precariedá; nes aules, porque reivindicamos una educación pública, laica y respetuosa cola diversidá sexual; parar de curiar, pa visibilizar el trabayu de reproducción y cuidos , concenciar en redol a ellos y el so redistribución; parar de consumir, porque fai falta repensar n’otres maneres de consumir más respetuosu col mediu ambiente y les nueses vides.

Dempués del pasacalles, a les 21 hores, la parte más lúdica de la Xornada Feminista va venir de la mano d’un conciertu que les trés artistes de la escena Hip Hop, GUAJA D, DANA y ELY SWING. Trés cantantes moces pero con un ampliu camín dientro de la escena y que nun van dexar indiferentes a les asistentes.