Xixón pauta nueves normes d’ocupación d’espacios públicos

Xixón pauta nueves normes d’ocupación d’espacios públicos
19 xunu 11:28 2020 Imprimir

El Conceyu de Xixón dio esta selmana a conocer los criterios xenerales pa conceder les autorizaciones d’ocupación temporal d’espacios públicos nel conceyu con instalaciones desmontables, n’espacios piatonales, venceyaes a actividaes culturales, deportives, d’ociu, promocionales y similares o espectáculos públicos y actividaes recreatives.

La nueva instrucción qu’afita competencies y criterios pa evitar la mercantilización del espaciu públicu. Coles mesmes, busca garantizar l’usu prioritariu para eventos d’interés xeneral y el caltenimientu del patrimoniu cultural.

La instrucción preve un plan d’usos específicu para la plaza de toros d’El Bibio, pol que nun van ser autorizaos eventos o actividaes privaes que nun sían d’interés xeneral, como pueda ser el Oktoberfest, fiestes privaes o de Nuechevieya. Amás, busca afitar les competencies de les distintes conceyalíes para autorizar l’usu d’espacios públicos y el procedimientu para faer les solicitúes, afitando criterios col máximu d’oxetividá posible.

La instrucción preve que s’autoricen, con calter xeneral, delles ocupaciones:

  • Venceyaes a actividaes culturales, divulgatives, deportives, d’ociu y espectáculos.
  • Solicitaes por asociaciones, fundaciones, partíos políticos, alministraciones públiques y entidaes de derechu públicu, para fines que constituyan el so oxetu o competencia o sopelexar y promocionar les sos actividaes.
  • Solicitaes para la realización d’actividaes entamaes pol Conceyu, los sos organismos autónomos y empreses municipales

Nun van ser autorizables, sacantes causes d’interés especial pa la ciudá debidamente xustificaes otres como:

  • Les ocupaciones de los espacios públicos na redolada de Bienes declaraos d’Interés Cultural señalaos nos planos so estes llínees. Escepcionalmente van poder autorizase ocupaciones pa la realización d’actividaes d’interés cultural o divulgativu siempres que nun supongan un riesgu pal caltenimientu de los bienes y que nun traigan la instalación d’elementos qu’interfieran na visibilidá de los bienes d’interés.
  •  Van autorizase ocupaciones de la Plaza de Toros d’El Bibio nos términos previstos nel so plan d’usos.
  • Les ocupaciones de vía pública si l’actividá a desenvolver inclúi transacción mercantil o comercial directa.
  • Les ocupaciones de calter publicitariu o promocional desenvueltes por empreses o entidaes de calter priváu, sacantes se desenvuelvan nel marcu d’actividaes que supongan un interés para la ciudá pola potencial atracción de visitantes, l’espardimientu de cuestiones d’interés xeneral, la promoción de la movilidá sostenible o de la meyora medioambiental o otres d’análoga naturaleza.
  • Ocupaciones solicitaes para la instalación de circos y otros espectáculos de calter codalosu en que los sos númberos actúen animales, o qu’éstos sían parte de la exhibición.
  • Les ocupaciones de vía pública qu’obedezan a intereses puramente particulares, tales como celebraciones de bodes, fiestes privaes, y similares.
  • Les ocupaciones con fines divulgativos solicitaes por particulares.
  • Les ocupaciones que la so duración tenga un calter continuu o periódicu.
  Categories: