‘Vengadores: Endgame’ yá ye la segunda película más taquillera de la hestoria

‘Vengadores: Endgame’ yá superó los 2.000 millones de dólares de recaldación en tol mundu y, tres solu dos selmanes nos cines, yá ye la segunda película más taquillera de la hestoria.

Colos últimos datos conocíos esti llunes, esti filme de Marvel Studios ingresó hasta agora 2.189 millones de dólares, una cifra cola que consigue superar a ‘Titanic’ (1997), qu’en total sumó 2.187 millones.

Esta estraordinaria resultancia en taquilla dexa a ‘Vengadores: Endgame’ como la segunda película más esitosa de tolos tiempos solamente por detrás de ‘Avatar’ (2009), que tien el récord global con 2.788 millones de dólares.

Solo cinco cintes en tola hestoria llograron más de 2.000 millones de dólares per vienta d’entraes: ‘Avatar’, ‘Vengadores: Endgame’, ‘Titanic’, ‘Star Wars: Episodiu VII- L’espertar de la Fuerza’ (2015), que llogró 2.068 millones; y ‘Vengadores: Infinity War’ (2018), que consiguió 2.048 millones. Esta clasificación de les películes más taquilleres de tolos tiempos nun tien en cuenta la inflación.

La recaldación de ‘Vengadores: Endgame’ non solo ye estelante pol so volume, sinón tamién pola rapidez cola que superó los 2.000 millones de dólares. ‘Avatar’ yera, hasta agora, la qu’algamara ese dato de 2.000 millones con mayor rapidez, pero para ello precisó en redol a un mes y mediu d’exhibición nos cines.

La marcha triunfal pa ‘Vengadores: Endgame’ sigue dempués de que batiera’l récord del mayor estrenu de la hestoria con 1.224 millones de dólares nel so llanzamientu (inclúi la fin de selmana y los díes previos de preestrenos o pases adelantraos).

Nesta cinta so la dirección de los hermanos Russo, los superhéroes que siguen con vida tres ‘Vengadores: Infinity War’ traten de ganar al malváu, y n’apariencia invencible, Thanos (Josh Brolin).

Robert Downey Jr., Scarlett Johansson, Chris Hemsworth, Brie Larson, Chris Evans, Chadwick Boseman, Chris Pratt y Zoe Saldaña son dalgunes de les estrelles qu’apaecen na repartida d’esta superproducción, que supon la película númberu 22 de Marvel Studios y la penúltima de la fase 3 a falta de la postrera de Spiderman.