Uviéu reivindica’l #8M con música y en clave d’humor

“Énte la crispadura, el mal humor y el tonu tan agriu col que se nos atacó a les muyeres nestos últimos meses, decidimos  que’l meyor forma de celebrar el 8M yera en clave d’humor”. Con estes palabres, la comunicadora Sonia Fidalgo, empezaba l’actu institucional con motivu del 8M.

Dende los balcones del Conceyu arrincaba la reivindicación municipal en favor del movimientu feminista. Na plaza, les muyeres de la Banda de gaites Ciudad d’Uviéu y decenes d’homes y muyeres escuchaben el so discursu filáu cola música de “Latxusma”, acordes llenos d’ironía qu’acompañaben a una intervención artística: viñetes qu’en clave d’humor que reflexaron, cavilgáu y reivindicáu les propuestes feministes.

En citando a Mafalda, Forges o Diana Raznovich, amás “de moces, mediátiques ya imprescindibles ilustradoras como Moderna de Pueblu, Luci Gutiérrez, Flavita Banana, Feminista Ilustrada, Agustina Guerrero a la moza ilustradora local, María Ortiz”, Sonia Fidalgo esplicó que l’actu celebróse güei día 7, “yá que vamos respetar el paru de mañana día 8” y convidó a participar na manifestación convocada mañana en Xixón y na concentración, de los dolce del mediudía, na plaza del Conceyu.

La conceyala d’Igualdá y Atención a les Persones, Marisa Ponga lleó entós dende’l balcón consistorial y aportunó: “Tolos díes han de ser de les muyeres y de los homes que saben vivir na igualdá. Pero faemos esta reivindicación poles muyeres víctimes de la fienda salarial, la discriminación, les migrantes, les ensin papales, les víctimes de la violencia machista (…) Celebramos el 8M porque’l feminismu contribúi a una sociedá más abierta ya igualitaria”.

La Vocera del Conseyu Municipal d’Igualdá, Paloma Martínez, d’Abogaes pa la Igualdá, destacó l’alcuerdu alcanzáu pol Conseyu de sumase a la Fuelga del 8M motivada pola desigualdá “qu’entá vivimos les muyeres (…) Volvemos parar pa demostrar que si nós paramos, se pa tou. nun vamos dexar que nos retayen los derechos conquistaos. Los derechos de les muyeres nun s’axusten. Convidámosvos a toos y toes a participar na manifestación. Un añu más, de nuevu na cai, paramos pa siguir avanzando•.

L’Alcalde, Wenceslao López, foi l’encargáu de cerrar l’actu. El primer conceyal empezó asegurando que “un añu más la celebración del Día Internacional de les Muyeres vuelve tomar les cais pa reivindicar la imprescindible, allampada y necesaria igualdá. La gran asignatura pindia de la nuesa sociedá porque la pilastra de cualquier democracia ye, ensin dulda, que toos síamos y sintámonos iguales. Dende’l Conceyu d’Uviéu quixímos que l’humor, la sorrisa cómpliz, sían los protagonistes de la nuesa reivindicación na campaña institucional porque hai poques medicines más efectives que la ironía p’aprender a mirar la realidá con otros güeyos. El sentíu críticu y l’ironía son preseos al algame de toos pa denunciar y avanzar con un talante optimista, dexando de llau’l posu amargoso que munches situaciones de desigualdá déxennos nel día ente día”.