Uviéu acueye del 3 al 5 de mayu la Selmana de la ONCE nel Principáu

La conceyala d’Atención a les Persones ya Igualdá, Marisa Ponga, presentó la Selmana de la ONCE nel Principáu d’Asturies, que se va celebrar del 3 al 5 de mayu n’Uviéu. Ponga tuvo acompañada pola presidenta del Conseyu Territorial del ONCE, Aitana Martínez y pol delegáu del ONCE n’Asturies, Pedro Ortiz.
Ponga empecipió la so intervención estimando al ONCE l’escoyer Uviéu como see de los actos de la Selmana del ONCE nel Principáu y animó a tolos uvieinos a participar nes distintes actividaes programaes  pola Organización. Aitana Martínez pela so parte, sorrayó la collaboración del Conceyu d’Uviéu, que dexa’l Palaciu de Congresos d’Uviéu (Calatrava) y el Teatru Filarmónica, y destacó qu’el so oxetivu ye dar a conocer a la sociedá asturiana’l llabor del ONCE.

La presidenta esplicó que’l públicu va poder ponese na piel d’una persona ciega y percorrer, colos güeyos tapaos, un circuitu de movilidá enfrentándose a les barreres que día ente día s’atopen les persones ciegues o con discapacidá visual. Esti circuitu va tar instaláu’l martes 3 y el miércoles 4 nel Palaciu de Congresos d’Uviéu. Pela mañana, alumnos de distintos colexos van poder participar nel mesmu ente que peles tardes va tar abiertu al públicu polo xeneral.

N’esti mesmu escenariu, va tar instalada una esposición de material específico utilizáu poles persones con discapacidá visual na so educación, trabayu, ociu y vida diaria que van visitar pela mañana los escolares y con entrada llibre peles tardes.

La lliteratura tamién va tar presente nesta Selmana del ONCE cola presentación del llibru ‘Los Rangos de Perón’ d’Alejandro Alonso, escritor ciegu arxentín que va recitar amás unos poemes. La cita va ser el martes 3 na Delegación Territorial de la ONC, a partir de les 18:00 hores y l’entrada va ser llibre.

El deporte va protagonizar la mañana del xueves 5 con una exhibición de goalball (deporte específico pa persones ciegues) nel IES La Corredoria. Esi mesmu día, a les 19:00 hores, el Coru del ONCE’l Grupu de Teatru ‘La Esfera’, de l’Asociación Cultural de persones ciegues y deficientes visuales d’Asturies, va poner n’escena ‘Siete muyeres ensin piedá’ na Filarmónica. La entrada va ser llibre hasta completar aforu.

D’últimes Pedro Ortiz, estimó la solidaridá de tolos asturianos y apuntó, nesti sentíu, que gracies a los ingresos procedentes de la vienta de productos de xuegu, l’ONCE atiende n’Asturies a 150 escolares con discapacidá visual, ufiertándo-yos material afechu, da empléu a 600 persones y sofitu a 1.600 ciegos de la rexón.