Un millón d’alumnos más y 30.000 profesores menos

Un estudiu de Comisiones Obreres da unes cifres que dexen les aules españoles nuna perdificil situación, depués de cinco años, con un millón más d’escolinos pa 30 mil profesores menos.

La federación d’enseñanza de CC OO, qu’esti martes presentaba estes cifres nel so informe añal d’entamu de cursu nel que se dicía que l’alumnáu de los centros públicos de les enseñances obligatories pasa de 5,8 millones d’alumnos nel cursu 2009-2010 a 6,9 el cursu pasáu. Son 1.036.000 estudiantes más, según les estadístiques del Ministeriu d’Educación, y 30.000 docentes menos.

El profesorao de centros públicos baxó de 507.709 a 477.778 nes enseñances obligatories, según datos del Ministeriu de Facienda.  En 2012 hubo cambeos significativos pa les aules españoles, porque namái qu’unu de cada 10 docentes que se xubilaben podía sustituyise pol amenorgamientu de la llamada tasa de reposición de funcionarios. Sumada a esa midida, el Ministeriu d’Educación camudó la llei pa que les comunidaes autónomes pudieren aumentar hasta un 20% el númberu d’alumnos per aula: un máximu de 30 estudiantes per clase en primaria; 36 en secundaria y 42 en bachilleratu.

El pasáu agostu, el ministeriu anunció qu’esi cambéu quedaba ensin efectu porque la tasa de reposición vuelve ser del 100% dende 2016. Tolos docentes funcionarios que se vaigan van ser sustituyíos.

A partir d’esti cursu, según Educación, podíen recuperase les ratios (númberu d’alumnos per clase) previos al retayu. Esto ye, 25 alumnos en primaria, 30 en secundaria y 35 en bachilleratu. Los docentes sollertaron entós de que yera imposible amenorgar esi númberu esti cursu coles plantiyes actuales. Delles comunidaes, como Madrid, anunciaron que lo estudiaríen a partir del cursu que vien.