Robert Redford anuncia dispidía con dos películes más

L’actor y director estadounidense Robert Redford anunció nuna entrevista la so intención de dexar l’actuación en rematando dos proyectos nos que s’atopa arreyáu nestos momentos.

Nuna entrevista col so nietu Dylan Redford publicada na web del muséu Walker Art Center de Mineápolis (EE.XX.) el xueves, l’actor respondió a una entruga sobre si consideraba volver pintar, una de les sos aficiones de moza, y dixo que cada vez-y cansa más la interpretación. “Soi una persona provecía, asina que ye difícil pa la mio sentame de brazos cruzaos y faer toma tres toma”, dixo Redford, quien recordó que tien 80 años.

“Tengo dos proyectos como actor en procesu: ‘Our Souls at Night’, con Jane Fonda, una hestoria d’amor de xente mayor que tien una segunda oportunidá na vida, y ‘Old Man with a Gun’, una pieza más llixera con Casey Affleck y Sissy Spacek”, esplicó. “Una vegada que tean feches, entós voi dicir: ‘D’alcuerdu, esto ye un adiós a tou eso’ y voi enfocar namá en dirixir”, aseguró.

Redford algamó la fama como actor gracies a películes como “Dos homes y un destín” (1969), “El golpe” (1973) o “Tal como yéramos” (1973), que-y convirtieron amás n’unu de los galanes más deseyaos de Hollywood, y darréu participó n’otros recordaos filmes como “Tolos homes del presidente” (1976) o “Memories d’África” (1985). Amás, saltó a la dirección con Xente corriente” (1980) y collechó más aplausos como realizador pol so llabor nes cintes “El dilema” (1994), “L’home que bisbisaba a los caballos” (1998) o “Lleones por corderos” (2007).