Les facultaes almiten qu’hai cursos que rebaxen la so esixencia

Les facultaes de la Universidá d’Uviéu vienen acabante de confirmar qu’en dellos graos hai un enclín a «baxar los niveles d’esixencia» nes asignatures de primer cursu.

La «dulcificación» de los criterios, como vienen en llamamlo, respuende a dellos factores. Per un llau, evitar qu’eses materies pasen a formar parte del Informe d’Asignatures de Baxu Rendimientu. Y per otru, la desaparente preparación cola que los estudiantes apuerten a la titulación universitaria qu’ellos mesmos escoyeron.

Asina s’esplica nel informe citáu, que’l llunes foi presentáu nel Conseyu Social de la Universidá y nel que les mesmes facultaes critiquen con durez la resultancia de les pruebes d’accesu a la Universidá. «Nun cumplen cola so función selectiva», sostienen los centros, qu’entienden qu’a partir d’ende xenérase toa una serie de problemes posteriores. Y ye que los estudiantes lleguen a la Universidá ensin recibir la orientación fayadiza sobro qué estudiar, na so opinión

«Nun se trata tantu de falta de conocencia sinón nel fechu de qu’eses conocencies nun s’adquieren cursando les asignatures de Secundaria correspondientes porque nun-yos alverten de la so importancia pa los estudios universitarios que deseyen cursar», dizse lliteralmente nel documentu.

Asina, a la fin, el primer cursu universitariu «conviértese de fechu n’unu selectivu». Pa tratar de superar esta situación, los centros proponen aumentar el númberu d’asignatures llave, evitar los grupos comunes y dixebrar la docencia por graos. Suxuren tamién incluyir ‘numerus clausus’, amenorgar el númberu d’alumnos per grupu y establecer clases de sofitu, «cursos cero que cumplan la so verdadera función», o intensificar les acciones tutoriales.

Les quexes, amás, tuvieron el so ecu nes conclusiones del informe, que califica d’efectu colateral non deseyáu esta rebaxa del nivel d’esixencia anque asegura que se trata de situaciones puntuales, que se corrixen de cursu a cursu. Entá asina, sí propón la necesidá d’articular mecanismos que dexen a les facultaes «exercer les sos competencies na ordenación y organización de los estudios».

Sicasí, l’informe sobro les asignatures de baxu rendimientu conclúi que polo xeneral la Universidá d’Uviéu nun tien problemes cola tasa de rendimientu -la relación porcentual ente los creitos superaos y el total de los matriculaos nun cursu- qu’ameyora cada añu. De 153 asignatures crítiques pasóse a 93. Y ye que, destaca l’estudiu, les facultaes tán trabayando de manera «bien intensa pa correxir les anomalíes» que se van detectando.