La XDLA crítica l’actitú represiva hacia l’asturianu na xornada electoral y pide pasos alantre pa iguar estes situaciones

Nuna nota de prensa asoleyada esti día, la Xunta pola Defensa de la LLingua (XDLA) crítica l’actitú represiva hacia l’asturianu na xornada electoral y pide a los partíos políticos pasos alantre pa iguar estes situaciones, depués de que la Xunta Electoral validara les papeletes n’asturianu d’Andecha Astur -anque namás nel recuentu y ensin poder aparecer nes meses electorales-. Esti partíu denunció qu’en plena xornada electoral y a lo menos nun cientu de meses taben retirándose les sos papeletes, colo que na XDLA atalante que ye “una intencionalidá represiva hacia’l nuestru idioma, dellos interventores reinterpretaron la resolución de la Xunta Electoral y retiraron toles papeletes d’esti partíu políticu”.

Pa la Xunta esta actitú “muestra la represión y el castigu exercíu sobre los asturfalantes y l’incumplimientu de la llexislación vixente, tanto a nivel asturianu como español y européu”. Por eso, la XDLA “pide a tolos partíos políticos que van tar representaos na Xunta Xeneral nueva que dean pasos alantre pa poner fin a estes actitúes propies d’un periodu predemocráticu”.

Y ye que la existencia de mayoríes nueves “va permitir -si les otres partes nun exercen un bloquéu- avanzar llexislativamente nel reconocimientu de derechos y nel desarrollu real d’una planificación llingüística afayadiza pal casu asturianu. De la mesma manera, hai que recordar qu’en tolos conceyos del país van tar representaos partíos políticos que llevaben nel programa un compromisu esplicitu col idioma de la nuestra tierra. La XDLA espresa la importancia -yá sía executándola dende’l Gobiernu local o faciendo propuestes dende la oposición municipal- de desarrollar una política lingüística a nivel de los conceyos. Quier dicise, dende les alministraciones más averaes al ciudadanu”.

Por mor d’ello, la organización pide “a tolos conceyos asturianos que dean pasos alantre na recuperación de la toponimia tradicional -hailu tovía que nun dio’l primer pasu pa empezar el procesu-, na estabilidá de los servicios de normalización y nos derechos llaborales de los sos empleaos, y nel desarrollu d’una política llingüística municipal, midíes que munches veces nun suponen nengún costu añadíu. Otra manera, hai que volver a insistir en qu’a nivel autonómicu ye preciso tamién dar pasos alantre p’acabar colos casos claros de represión exercíos contra les persones que quieren utilizar el so idioma na vida cotidina y nel exerciciu de los sos derechos democráticos como ciudadanos”.