La Universidá va buscar financiamientu pa potenciar la investigación nel estranxeru

La Universidá va buscar financiamientu pa potenciar la investigación nel estranxeru
10 xineru 13:30 2017 Imprimir

Ameyorar la participación investigadora de la Universidá en programes europeos va ser l’oxetivu de la Universidá pa los próximos trés años y pal que va buscar financiamientu tantu público y como privao, sigún apautó ayeri’l Conseyu de Gobiernu de la institución asturiana.

El Conseyu de Gobiernu aprobó esti llunes nuna sesión estraordinaria’l Plan Propiu d’Investigación y Tresferencia pa 2017/2020, dirixíu a potenciar a los sos investigadores nel denomináu H2020 (Horizonte 2020), la estratexa de la Unión Europea pa la investigación y l’innovación, según les tornes por tresferencia de les resultancies na sociedá.

La entidá entá nun definió la procedencia de los fondos colos que se va dotar económicamente el programa, anque tien claro lo qu’escuerre: «Aumentar la calidá de la investigación, amontar la producción investigadora tantu global como por investigador individual, aumentar la repercusión social de la investigación, favorecer la investigación multidisciplinar, amontar la tresferencia de conocencia y tecnoloxía a la empresa, crear venceyos y estructures estables de trabayu nel texíu empresarial y participar en grandes proyectos y consorcios internacionales I+D», esplicaron ayeri tres el Conseyu de Gobiernu.

El Plan Propiu arreya «en mayor o menor midida» a tola estructura de gobiernu de la Universidá d’Uviéu, anque «d’una forma más marcada» tán implicaos los vicerrectorados d’Investigación, d’Acción Tresversal y Cooperación cola Empresa, la delegación del Rector pa la Coordinación y Estratexa, xerencia y vicegerencia de Recursos Humanos, sí como la Fundación Universidá d’Uviéu. El programa ta amestáu a la Estratexa Europea de Innovación Europa 2020, l’actual Estratexa Española de Ciencia y Tecnoloxía y d’Innovación y l’Estratexa d’Especialización Intelixente RIS3. Los pormenores del plan van quedar definíos na xunta ordinaria que’l Conseyu de Gobiernu va celebrar dientro de diez díes. Na sesión estraordinaria que tuvo llugar ayeri aprobáronse los premios estraordinarios de Doctoráu pa les meyores tesis lleíes na Universidá’l cursu 2014/2015.

  Categories: