La Llei d’Autoridá del Profesoráu nun va tar llista hasta l’añu que vien

La Llei d’Autoridá del Profesor va tener qu’esperar un pocu más de lo que xd tenía previsto nel Principáu, porque magar la intención de la Conseyería d’Educación yera tener llistu esti documentu primero que rematara l’ñu nun va ser hasta 2018 que se tenga llista la norma.

Genaro Alonso, en visitando’l IES de Llanera, incidía la selmana pasada en que’l borrador d’esta llei “ta yá en fase avanzada”. Una norma aprobada hai yá cuatro años pero que sigue ensin rematar el so desenvolvimientu. Tamién va tar n’ese mesmu plazu, según les previsiones del conseyeru d’Educación, el decretu de derechos y deberes. Estes reglamentaciones, apuntó Alonso, tuvieron que ser afeches a los problemes que se detectaron nos últimos tiempos. Esto ye, tuviéronse qu’incluyir respuestes a situaciones como’l ciberacosu.

Sicasí, dende la conseyería vien calteniéndose que’l clima de convivencia nos centros educativos asturianos nun rexistra una conflictividá elevada. Tolo contrario, el mesmu Genaro Alonso llegó a calificar la convivencia de «satisfactoria». Asina s’esprendía, amás, d’un estudiu realizáu en 23 centros educativos, tanto públicos como alcordaos de Secundaria na rexón. Un informe del que s’esprendía que’l grau de “prestu, respetu y de collaboración colos sos compañeros y profesores ye bien aceptable”.