La edición númberu 71 del festival de Cannes peslló les sos puertes

22 mayu 18:28 2018 Imprimir

L’ausencia de Netflix marcó la programación de la edición númberu 71 del festival de Cannes que peslló les sos puertes esta fin de selmana, cola escelente resultancia de la selección competitiva, con nomes inesperaos, con sorpreses y grandes películes.

La prohibición de selfies na alfombra colorada, una de les grandes midíes del añu, nun resultó tan inocente como podía paecer. La persecución foi efectiva, con una especie de fotopolicíes recordando a los posibles infractores. Unos grandes cartelos recordaben la prohibición, y el mesmu Thierry Frémaux, l’amu de Cannes, el director del eventu, afeó nun momentu dáu la presencia de los teléfonos móviles nes manos de los asistentes.

La imposición d’una cierta seriedá enterrió l’espectáculu de l’alfombra colorada. Lo qu’otros años yera una fiesta, con pinchadiscos de sonadía, animando musicalmente l’eventu y dando al conxuntu l’ambiente distendíu, como de pista de baille, derivaron anguaño, per primer vegada, n’una alfombra colorada con un ciertu aire de procesión relixosa.

El signu más claru de que Cannes, al paecer, dexó d’interesar al Hollywood postWeinstein tener na mesma Croisette, balera de grades cartelos promocionales de supuestos futuros taquillazos. Otros años los cartelos cubríen les fachaes modernistes d’hoteles como’l Gran Hotel, el Martinez, el Carlton o’l Majestic. Anguaño, sicasí, el skyline de Cannes d’anguaño paecía a lo que ye en realidá: el d’un pueblu mediterráneu con aspiraciones arquitectóniques.

Sía que non 82 muyeres a los pies del Gran Palaciu del Cine, axuntaes nel ecuador del festival, la pasada selmana, caúna d’elles en representación de les tan solo 82 cineastes que xubieron les escaleres coloraes de Cannes dende l’entamu de la so esistencia (frente a los más de mil directores ) reclamaben visibilidá ya igualdá. Pero la participación de tan solo trés muyeres a la direición na sección competitiva d’esta edición, yá clausurada, frente a una ventena llarga de directores masculinos que presentaron los sos filmes, fala del trabayu que, n’ese sentíu, inda queda por realizar.

  Categories: