IX propón especialistes del asturianismu cultural na so representación institucional

Izquierda Xunida vieno acabante proponer como los sos representantes nos órganos de la Xunta Xeneral del Principáu a profesionales y especialistes con una oldeada trayectoria personal y pernomaos nel ámbito cultural asturianu como Javier Fernández Conde o Chus Pedro.

Especialistes como’l del medievalista Francisco Javier Fernández Conde pal Centru Rexonal de Belles Artes, músicos como Jesús Pedro Suárez (Chus Pedro) pal Conseyu Rector de la OSPA, o la profesora titular d’hestoria del Arte de la Universidá d’Uviéu, Natalia Tielve pal Conseyu de Patrimoniu cultural d’Asturies.

L’oxetivu de la coalición ye llograr qu’estos órganos cunten con una composición lo más fayadiza a los fines que s’escuerren en cada unu d’ellos. Y por mor d’ello, n’anuncia de la propuesta, el coordinador d’IX Asturies, Manuel González Orviz, resaltó la trayectoria de compromisu políticu y ciudadanu de esos representantespropuestos, porque les cares “nun son nueves, nun asomen nesti momentu, porque entendemos que la esperiencia sirve, ye imprescindible y toes y cada una d’elles son referentes nos sos respectivos ámbitos con una esperiencia oldeada”

En Conseyu Social de la Universidá d’Uviéu, IX presentó a Gema González García, inxeniera técnica especializada en química y anguaño venceyada profesionalmente al grupu EDP-HC.

Pal Conseyu Rexonal de Desenvolvimientu Agroalimentario, IX tien desinao a Luis Miguel Álvarez Morales, llicenciáu en veterinaria y con una dilatada esperiencia profesional na Conseyería de Mediu Rural.

Nel casu del Conseyu de Comunidaes Asturianes, la persona escoyida por IX ye José Manuel Menéndez Argüelles, un asturianu nacíu y residente en Bruxeles, inxenieru agrónomu y director de l’Axencia de Desenvolvimientu d’Economía Social en Anderlecht, Bruxeles dende 1993.

Mari Fran Hevia Blanco va ser la representante d’IX nel Conseyu pa la Promoción de l’Accesibilidá y la Eliminación de Barreres. Hevia Blanco, en siella de ruedes dende hai 7 años, forma parte de Difac, organización na que desempeña la función de secretaria.

Y finalmente, nel Conseyu Asesor de Turismu, la representante d’IX va ser la educadora Elsa Abargane, venceyada familiarmente a la restauración y al turismu rural y miembru de l’área de Turismu d’Izquierda Xunida d’Asturies.