El Principáu pon a les químiques como exemplu de relación ente empresa y FP

Potenciar la Formación Profesional (FP) convirtióse n’una de los grandes apuestes del Principáu y la primer midida a tomar pola Conseyería d’Educación va ser establecer contactos tantu col sector industrial como col tecnolóxicu pa «amontar la relaciones ente los centros educativos y les empreses».

Asina lo aseguró Javier Cueli, director xeneral d’Enseñances Profesionales, tres la xunta caltenida en Xixón con directores de los Centros Integraos de Formación Profesional qu’esisten n’Asturies. Según esplicó Cueli, la comunicación va intensificase, sobremanera, con aquellos sectores onde se repara «más velocidá de cambéu tecnolóxicu». Esta conexón, abondó, «supon l’apurra d’un capital de conocencia que nun podemos esbardiar» y que va sirvir pa «averar» la Formación Profesional a les demandes del sector empresarial; según, por que ésti conoza que tipu de preparación recibe l’alumnáu. La mayor coordinación va dexar ufiertar «una meyor formación y la capacidá d’afaese con rapidez al ámbitu llaboral», señaló.

El primer pasu va ser «falar colos sectores implicaos y les asociaciones profesionales», pa dempués poner en marcha «un sistema qu’afite esta relación». Como exemplu a siguir nesti tipu de sinergias, Cueli fixo referencia a «la esperiencia de collaboración que dende va un añu llevar a cabu col cluster d’empreses químiques, que creemos que puede trespasase a otru tipu de sectores».

La necesidá d’acompasar la FP cola actividá empresarial, siguió, «nun se debe tantu a qu’haya un desfase ente les titulaciones y la demanda llaboral, sinón al desconocimientu mutuu qu’esiste». Ello ye que «la mayor parte de les titulaciones entamáronse relativamente recién, les más antigües son de 2008 y hai que s’enllantaron en 2014». Enagora, Cueli refuga que se vaigan a enllantar nueves titulaciones na FP asturiana.