El PP lleva’l plan pilotu col asturianu como llingua vehicular al Tribunal Superior de Xusticia d’Asturies

Iniciativa pol Asturianu denunciaba esti día l’actitú radical ya antidemocrática del partíu presidíu por Mercedes Fernández al conocese que’l PP va llevar el plan pilotu col asturianu como llingua vehicular al Tribunal Superior de Xusticia d’Asturies.

Iniciativa pol Asturianu reclama al PP esti día, nuna nota de prensa recién asoleyada, que dea exemplu de la so petición continuada de más llibertá d’elección pa les families nel sistema educativu, retirando la demanda presentada nel Tribunal Superior de Xusticia d’Asturies (TSXA) contra’l plan pilotu pa incluyir l’asturianu como llingua vehicular una hora a la selmana.

Iniciativa quier recorda-y al PP d’Asturies qu’esti plan, que pa Iniciativa pol Asturianu ye dafechu insuficiente n’hores y conteníos, tien l’absoluta garantía de llibertá, tanto pal alumnáu y les families, como pal profesoráu y los centros, que s’apunten, toos ellos de forma voluntaria a participar nel mesmu.

Dende Iniciativa pol Asturianu nun son a entender cómo ye posible que’l PP quiera introducir planes de billingüismu col inglés de forma obligatoria, mientres refuga la posibilidá de que de forma voluntaria dafechu y esperimental, les families que quieran puedan llevar a los sos fíos y fíes a una hora a la selmana de clases impartíes n’asturianu, nes qu’amás, van dase tamién los conteníos en castellán.

La asociación de defensa del idioma entruga al PP d’Asturies si lo que quier ye que l’asturianu desapaeza nes próximes xeneraciones: “Si ye asina, sedría coherente esta postura. Sicasí, el PP diz defender la protección del asturianu, polo que nun s’entiende la so postura contraria a les midíes que favorecen esi oxetivu. Esti ye un nuevu ataque de Mercerdes Fernández Cherines, que nun respuende a les opiniones que mos lleguen de les bases del PP y d’otros munchos dirixentes del partíu, que nun entienden estes posiciones agresives contra l’asturianu, que namás lleven al PP a una postura marxinal y antidemocrática”.