El Parlamentu Européu reclama fondos pa garantizar y protexer les llingües minoritaries de la Unión Europea

El plenu del Parlamentu Européu aprobó esti miércoles un testu que reclama fondos comuñales y midíes específiques de los Estaos miembros pa protexer les llingües minoritaries de la Unión Europea, como’l gallegu, el catalán y el euskera, coles mires de favorecer el multillingüismu y evitar que queden desaniciaes. El documentu inclúi delles enmiendes promovidas pol PNV y CiU, cola idega cimera de que la definición de llingües en peligru de desapaición contemple aquelles en zones transfronterices que tean en riesgu “en parte del territoriu en que son propies, anque dispongan de protección n’otres zones del continente, y tengan o non reconocencia oficial”.

La eurodiputada de la PNV Izaskun Bilbao, promotora de les mentaes enmiendes, celebró’l sentíu del votu porque considera que supon una llamada d’atención a los Estaos miembros o rexones que “tán poniendo en peligru, coles sos polítiques, la supervivencia de llingües” nel so territoriu, una “clara referencia” a polítiques llingüístiques como les aplicaes per Francia y Navarra sobre l’euskera.

La representante jeltzale na Eurocámara confió en que l’informe “ayude a despolitizar” l’alderique llingüísticu que, al so xuiciu, ta “llenu de tópicos”, afitando que’l Parlamentu Européu ve nel multillingüismu qu’inclúi llingües minoritaries “un valor européu”.

El testu de la Eurocámara apunta que la diversidá llingüístico y cultural ye unu de los principios fundamentales de la Unión Europea y considera que “numberoses” llingües europees tienen de ser consideraes como llingües “amenaciaes de desapaición”, polo qu’encamienta a tomar midíes.

Tamién pide a los Estaos miembros y a les instituciones europees que “sían más conscientes de la grave amenaza qu’escolga sobre’l futuru de numberoses llingües n’Europa” y reclamen esfuerzos pa salvaguardar y fomentar la diversidá del patrimoniu llingüístico y cultural de la UE, por casu sofitando polítiques de salvaguarda nel senu de les comunidaes afectaes.

Nesti sentíu, apuesten por emplegar los fondos que dexe la UE nel periodu 2014-2020 pa sofitar estes llingües, al traviés de programes pa educación y formación, mocedá y deporte, los fondos estructurales y de cohesión o otru preseos rellacionaos coles nueves tecnoloxíes y les plataformes multimedios.

Asaturies podría quedar fuera

Al nun ser l’asturianu llingua oficial, Asturies podría quedar fora d’estes ayudes perdiendo una bona cantidá de recursos económicos enforma importantes nun momentu de crisis como’l d’anguaño.

PNV y CiU tamién plantegaben que la UE sofite los programes que dexen “l’alquisición de dos lengua maternes dende la infancia” porque va ayudar a la persona nel aprendizaxe ulterior d’otros idiomes y porque ufiertaría un respaldu concretu pa “revitalizar la tresmisión intergeneracional ellí onde tea amenaciada”.