Paul McCartney aprovecha’l confinamientu para componer nuevu álbum

D’una manera inesperada Paul McCartney va publicar el próximu 11 d’avientu McCartney III , un nuevu álbum que supón el tercer capítulu d’una triloxía que tuvo les sos anteriores entregues nun llonxanu pasáu, concretamente en 1970 y 1980. Según comunicó la selmana pasada, el nuevu material grabose na granxa que tien en Gran Bretaña y escribiólu nos momentos más duros y alarmantes de la primer fola del coronavirus.

Como suel faer en delles de la so obres en solitariu, nesta ocasión foi prácticamente obligáu qu’él compunxera toos les temes y responsabilizárase de la totalidá de les instrumentaciones que percuerren l’álbum.

Esti discu nun entraba nos planes conocíos de l’axenda del gloriosu músicu inglés, yá que en principiu nun tenía nengún proyectu al curtiu plazu, dempués d’allumar va dos años el so hasta agora últimu álbum Egypt Station. Sicasí, y como el mesmu reconoz na so páxina web, la situación obligada conduciólu a ponese a escribir.

Remembra’l músicu que “taba viviendo una vida de confinamientu na granxa, cola mio familia, y entraba nel mio estudiu acaldía”, y eso de dalguna manera fíxo-y retomar daqué dexáu inconcluso nel pasáu, en concretu “delles coses nes que trabayara a lo llargo d’años” y que taben “a mediu terminar”.

McCartney tamién esplica que volvió poner manes a la obra compositiva dempués d’escuchar una antigua tema propia que permaneció inédita, When winter comes , de 1990 y que ellí empezó tou. Dende esi momentu, asegura, “solo faía lo que me pruyir faer. Nun tenía nin idea de si esto terminaría siendo un álbum”. Al material orixinal, el pernomáu baxista sumó nuevos fragmentos p’acabar dando forma a Long tailed winter bird, la tema que teóricamente va abrir el nuevu trabayu.