El debate sobre’l nuevu Estatutu escomienza con abondes diferencies ente PSOE, IX-BA y PP

18 xineru 00:19 2006 Imprimir

La pitición al Conseyu Consultivu del dictame sobre la reforma del Estatutu podía producise esta mesma selmana y con ello l’empiezu de los trámites colos que se va entamar el debate hacia l’ampliación del autogobiernu. A puntu de principiar l’alderique les diferencies ente les tres fuerces representaes na Xunta Xeneral sobre la reforma autonómica son abondo estremaes como pa barruntar un alcuerdu.

La última aportación al discutiniu facíala la conseyera de Vivienda y Servicios Sociales, Laura González, que buscó un puntu d’alcuentru ente les discrepancies de la FSA ya Izquierda Xunida-Bloque por Asturies sobre la necesidá de la reforma y el ritmu d’entamala asegurando en declaraciones a Canal 10 que: “na reforma del Estatutu nun tenemos que ser los primeros, pero tampoco los últimos”. Pa la conseyera d’IX-BA nin siquier la importante diferencia que separa al so partíu de los socialistes en materia llingüística había ser insalvable: “la llingua nun tien por què ser un escollu pa camudar l’Estatutu”, aseguró.

Nos últimos díes el responsable de la Federación Socialista Asturiana Javier Fernández dibuxara les llinies esenciales de la reforma que quier la so formación, una reforma “ensin idea identitaria, como ampliación de competencies p’allegar l’administración a los ciudadanos” y na que la cooficialidá del asturianu taría descartada. A estes declaraciones retrucaran el coordinador d’Izquierda Xunida d’Asturies Jesús Iglesias afirmando que’l PSOE “tarrecía la reforma” y tocante a la llingua qu’ésta “corría seriu peligru de supervivencia” si les posiciones socialistes nesti asuntu triunfaben. Nel mesmu sen espresárase’l conseyeru Francisco Javier García Valledor qu’aseguró respective a la rocea de los socialistes asturianos a apostar pol autogobiernu que “la FSA va a la reforma como oveya al Macelo”.

La posición de la otra fuerza política de la Xunta Xeneral, el Partido Popular, nun puede tar más allonxada de les de PSOE ya IX-BA y nos últimos meses el so másimu cabezaleru, Ovidio Sánchez lleva recalcando que la so formación nun considera necesaria la reforma asturiana y menos “mientres nun se solvente’l problema nacionalista n’España”, como repite constantemente’l presidente de los populares d’Asturies.

Col debate esparmentáu nesos términos discrepantes, el Conseyu de Gobiernu del Principáu podía solicitar al Conseyu Consultivu el so dictame pa entamar los trámites del nuevu testu estatutariu. El secretariu xeneral de la FSA, Javier Fernández, aseguró esta mesma selmana que la intención del so partíu ye tener la reforma fecha d’equí a un añu, un plazu sobre’l que tampoco paecen tar d’alcuerdu los sos socios de pautu de gobiernu d’IX-BA nin la oposición del PP.

  Categories:
Loading Facebook Comments ...