El Conceyu d’Uviéu y Ecoembes ponen en marcha la campaña de concienciación “La Llata que Caltien”

La conceyala d’Infraestructures y Servicios Básicos del Conceyu d’Uviéu, Ana Rivas; y la xerente de Marketing de Ecoembes, Susana Revuelta, presentaron esta selmana pasada n’Uviéu La llata que caltien, una campaña destinada a fomentar el reciclaxe de llates nel contenedor mariellu.

Ecoembes, la organización medioambiental ensin ánimu d’arriquecimientu que promueve la sostenibilidá al traviés del reciclaxe d’envases n’España, impulsa esta iniciativa na que collabora col Conceyu d’Uviéu pa motivar a los asturianos y asturianes na separación de los envases domésticos nos sos llares, especialmente no relativo a los metálicos (llates de conserves y de refrescos).

Pa ello, del 6 al 11 de xunetu, van instalase stands con monitores asitiaos en puntos estratéxicos de la ciudá informando a los transeúntes alrodiu de la importancia de la so collaboración nel reciclaje d’estes borrafes. Coles mesmes, unviáronse cartes a los vecinos por que se impliquen nesta acción, y animóse-yos a visitar la web de Ecoembes (http://www.ecoembes.com), onde van poder afayar tolos beneficios que tien el reciclaje pal mediu ambiente.