El Cine del Atenéu proyecta Akira nel so 30 Aniversariu

Avientu Animáu, cine d’animación p’adultos, ye’l ciclu que trai esti miércoles 26 al Atenéu de La Calzada laproyección de la película d’animación xaponesa “Akira” nel añu nel que se celebra’¡l 30 aniversariu de la película que camudó’l cine d’animación.

Esiste’l tópicu de que l’animación ye un xéneru pensáu principalmente pal públicu infantil; sicasí hai numberosos exemplos de que nun tien por qué ser asina. La esposición de temátiques complexes ufiertaes de manera intelixente, acompañaes de referencies a la cultura popular, dientro d’una serie de productos pensaos para un públicu adultu o xuvenil, ganaron muncha popularidá nos últimos años.

Presentación previa a cada proyección.

Akira -30 Aniversariu-

CMI Atenéu La Calzada. Salón d’actos. Miércoles 26 d’avientu a les 19.00 hores

Xapón 1988. Dir. Katsuhiro Ôtomo. 124′. V.O.S.

Añu 2019. Neo-Tokyo ye una ciudá construyida sobro les ruines de l’antigua capital xaponesa destruyida tres la Tercer Guerra Mundial. Xapón ye un país en cantu del colapsu que sufre continues crisis polítiques. De callao, un equipu de científicos volvió a entamar por orde del exércitu un esperimentu p’atopar a individuos que puedan controlar l’arma definitiva: xuna fuerza denominada “la enerxía absoluta”. Pero los habitantes de Neo-Tokyo tienen otres coses de les qu’esmolecese. Unu d’ellos ye Kaneda, un mozu pandillero líder d’una banda de motoristes. Mientres xuna engarradiella, el so meyor amigu, Tetsuo, sufre un estrañu accidente y termina ingresáu nunes instalaciones militares. Ellí los científicos van afayar que ye’l posesor de la enerxía absoluta. Pero Tetsuo, que nun se resigna a convertise nuna cobaya, bien llueu se va convertir na amenaza más grande que’l mundu conoció (filmaffinity.com).

La película que meyor define la manga, na que l’espectador va atopar tolos sos elementos, estétiques y conceutos. Visualmente arrogante y con un ritmu brengosu, ta considerada xuna de les meyores creaciones de l’animación, y supunxo l’espardimientu del anime y manga xaponés.

Non encamentada pa menores de 12 años.