Educación va dar les máximes facilidaes para superar el cursu

Educación va dar les máximes facilidaes para superar el cursu
16 abril 13:15 2020 Imprimir

Nun va haber aprobáu xeneral, el cursu sigue tal que taba establecíu (nin s’amplía nin se retaya), el tercer trimestre va ser evaluáu en función de les xeres realizaes, anque se dexa la puerta abierta a qu’haya exames); solo podrá avanzase materia de manera escepcional para xubir nota y los conteníos que queden pindios van recuperase’l próximu cursu. Esa ye la realidá del cursu escolar sigún Educación.

Son les idees qu’espunxeron ayeri tanto la ministra d’Educación, Isabel Celaá, como la conseyera asturiana del ramu, Carmen Suárez, tres la xunta de la Conferencia Sectorial, na que ministeriu y autonomíes encetaron cómo se va llevar a cabu’l final de cursu.

«Nun concebimos l’aprobáu xeneral», dixo contundente’l ministeriu. «Porque, si asina fora, daría igual lo que l’alumnu fixera y sería inxustu con aquellos que busquen superase». Pero, nunes circunstancies tan escepcionales, colos estudiantes confinaos pola crisis del coronavirus, la idea de les admistraciones ye dar toles facilidaes pa la promoción, pa pasar de cursu y que la repetición sía daqué «bien escepcional». Pero too eso con dos premises: De primeres, que mientres el periodu d’enseñanza non presencial va tratar de reforzase y ampliar los conteníos yá daos nel primera y segundu trimestre, faciendo fincapié en xeres interdisciplinares, y que la posibilidá escepcional» d’adelantrar materia (que sí esiste, especialmente pa cuartu d’ESO y segundu de Bachilleratu) va sirvir pa xubir nota.

La conseña xeneral, por tanto, ye facilitar la promoción, comprobando, primero de too, que l’alumnáu adquirió les competencies riquíes nesi nivel. «El nuesu curriculum ye enciclopédicu, profuso y perampliu y lo qu’hai que faer ye centrase nes competencies esenciales, al igual que los países de la nuesa redolada», aprofió Celaá.

Ello ye que nel casu de considerar necesaria la repetición de cursu, los equipos docentes tendrán de xustificar la so decisión. «Les xeres tienen de ser valoraes en términos positivos», aportunó la conseyera. Inclusive se dexa la puerta abierta a realizar pruebes o exames de forma ‘on line’, igual qu’estudia la Universidá.

Les alministraciones caltienen la esperanza de poder volver a les aules siquier quince díes. Pero, sía como fora, el cursu va rematar el 30 de xunu (les clases van acabar el 18 de xunu pa Infantil y Primaria y el 23 pa ESO, Bachilleratu y FP). Al respective de la materia pindio, va recuperar nel próximu cursu. Ello ye que el ministeriu creó un grupu de trabayu con esti fin: resolver cómo se modificar los conteníos de les distintes asignatures y niveles.

Tamién s’encetó la prueba d’accesu a la Universidá, la EBAU. La intención ye podela faer de manera presencial. «Nun hai plan B», apuntó la ministra, anque llegáu’l casu, y si non pudiera celebrase (n’Asturies ta afitada pal 30 de xunu y 1 y 2 de xunetu), «veríase’l procedimientu». Nesti sentíu, plantegóse la posibilidá de dar marxe hasta’l 10 de setiembre.

  Categories: