Educación va convocar 1.308 places de secundaria y amenorgar la interinidá

Educación va convocar 1.308 places de secundaria y amenorgar la interinidá
05 avientu 09:34 2017 Imprimir

Avanzar na estabilización del profesoráu cola “mayor ufierta pública d’empléu de la hestoria d’esta comunidá autónoma” foi la xustificación del conseyeru d’Educación al defender esta selmana’l proyectu presupuestariu ellaboráu pal so departamentu, destacando n’asturianu la ufierta d’empléu públicu que tien cuenta de acometer l’añu que vien con más de 1.300 places pa docentes de Secundaria y de Formación Profesional pa que la so convocatoria envalorar un costu de 1.150.976 euros.

De les 1.308 places que se van convocar y coles que pretende estabilizase al profesoráu interín, 878 van ser pa ingresu na función pública y 430 van tar centraes na promoción interna. Amás, 92 d’estes places van quedar acutaes pa persones con discapacidá. Genaro Alonso afitaba ayeri na Comisión de Facienda de la Xunta Xeneral estes cifres, dientro d’un presupuestu global pa la so conseyería que suma un 3,33% más al respective de 2017 hasta algamar los 808.868.970 euros.

Tamién va haber novedaes al respective de la rede de cero a trés años, que preve aumentar la so partida hasta los 11,45 millones, un 18,61% más. Dineru que quier destinase a la dotación de dos técnicos educativos per cada unidá y l’estensión de la rede en conceyos como Uviéu. Tamién pretende abrir nuevos centros en Piloña, Ribedeva y Casu.

Meyora de centros yá esistentes, construcción d’otros nuevos, el financiamientu universitariu (que l’añu que vien supon una partida de 126.202.084 euros) y “sofitu decidíu al deporte y a la cultura asturiana” emponen amás el proyectu presupuestariu del departamentu qu’encabeza Alonso.

El conseyeru defendió que trata d’un programa de gobiernu que concibe la educación como “un componente básicu y fundamental que garantice un modelu de desenvolvimientu económicu sostenible”. Amás, les cuentes inclúin midíes de rescate social para garanticen l’accesu a la educación en condiciones d’igualdá y el sostenimientu de la equidad. Ente elles, partíes pal préstamu de llibros, pal impulsu del tresporte escolar, beques universitaries y pa personal investigador. En cuantes al quintu programa de FP dual, va caltenese’l plan esperimental de la caña sanitaria y va trabayase pa enllantar nel cursu 2018-2019 un proyectu de trés cursos en seis ciclos formativos del ámbitu industrial ya informáticu.

Per otra parte, les cuentes dediquen 78.230 euros a los trabayos d’ampliación del rexistru del patrimoniu industrial y l’ellaboración d’estudios ya inventarios temáticos. Y en subvenciones a particulares y conceyos pal caltenimientu de patrimoniu van dise 502.597 euros, 227.597 más qu’anguaño.

Genaro Alonso, que remató la so intervención n’asturianu, dixo que les cuentes “asitiennos dafechu nel camín d’una decidida y sólida recuperación”, afitando tamién que “nun fai falta qu’aportune en qu’una prórroga presupuestaria tendría consecuencies mui negatives, al par que murnies, pa tolos ciudadanos y ciudadanes d’Asturies y yo faigo votos pa qu’eso nun asoceda”.

  Categories: