Diverses ufiertes de festivales folk siguen l’aldu de San Xuan pa esti fin de selmana

L’empiezu del calandariu festivu del veranu cola foguera de San Xuan sigue’l so aldu esti fin de selmana cola celebración de diversos festivales de música folk pa la nueche del sábadu 25. Asina el Parque del Oeste d’Uviéu acueye un añu más los Alcuentros de música tradicional, organizaos pola asociación Trebolgu; Nava sigue celebrando’l Gongresu Internacional sobre la gaita con un conciertu de bandes y una nueche folk; y La Pola Llaviana, entama un mercáu tradicional que remata coles actuaciones de Felpeyu y Los Ciquitrinos.

Nos Alcuentros de Trebolgu n’Uviéu escomiencen na mañana del sábadu 25 con un desfile de gaiteros peles cais del barriu L’Argañosa. Pela tarde a les 20.00 nel Parque de l’Oeste les bandes de gaites Esbardu d’Uviéu y Llariegu de Sariegu ufierten una actuación colo más significativo del so repertoriu. El platu fuerte d’estos alcuentros ye a les 22.00 hores, cola nueche folk na que van participar les pandereteres Dulkamara, los cántabros Manuel Luna y Brena La Música, pa detrás los riosellanos Corquiéu, que presentarán el so nueu discu Salia, acabante salir al mercáu, y los mierenses Skanda, col trabayu Sangre d’Ochobre.

En Nava siguen el fin de selmana les actividaes del Congresu Internacional de la Gaita y na tarde del sábadu va celebrase un desfile de les bandes participantes nel eventu, que vuelven actuar pela nueche nun festival na Plaza de Manuel Uría. La capital del conceyu de Llaviana acueye tamién estos díes un mercáu tradicional nel que va haber amueses de xuegos populares asturianos y actuaciones teatrales a cargu de la compañía Yeppa y el grupu Retueyu. A les 12 la nueche na plaza l’Ayuntamientu de La Pola Llaviana va entamar un conciertu de Felpeyu y los Ciquitrinos.