Convocaes beques comedor, atención temprana y ayudes a la conciliación en Xixón

Convocaes beques comedor, atención temprana y ayudes a la conciliación en Xixón
20 xunetu 09:07 2020 Imprimir

La Xunta Rectora de la Fundación Municipal de Servicios Sociales dio lluz verde esta selmana pasada, por unanimidá, a l’ampliación del plazu d’execución de la convocatoria pública de beques comedor y d’atención  temprana del cursu del cursu recién fináu, pa los meses de setiembre, ochobre y payares del cursu 2020/2021, al nun poder executase na so totalidá, debíu al zarru de los centros escolares pola crisis sanitaria del COVID-19.

Coles mesmes, aprobóse la concesión directa de dambes beques pal períodu entendíu ente avientu de 2020 y xunu de 2021, a los menores a los que-yos fueron concedíes nel cursu 2019/2020, siempres qu’apurran, antes del 30 de setiembre, xuna declaración responsable na qu’espongan que siguen axuntando los requisitos acreditaos na fecha de la solicitú de la beca comedor y/o d’atención temprana, pal cursu escolar 2019/2020.

AYUDES A LA CONCILIACIÓN DE LA VIDA FAMILIAR Y LLABORAL

Per otra parte, la Fundación de Servicios Sociales va poner en marcha per primer vegada, ayudes a la conciliación de la vida familiar y llaboral, dirixíes a aquelles unidaes de convivencia que, nun axuntando los requisitos económicos o sociales p’aportar a la beca comedor, cunten con dificultaes de conciliación llaboral.

Nesti casu, los ingresos de la unidá familiar nun tienen de superar los 26.318’57 euros (3’5 vegaes el IPREM) y va concedese el 50% del aprecio/mes del importe de la beca comedor que correspuenda nel colexu nel que tea matriculáu l’o la menor, en conceutu d’ayuda a la conciliación de la vida familiar y llaboral; o’l 75% del aprecio/mes de la beca comedor, nel casu de families numberoses, families monomarentales o monoparentales, y menores con discapacidá igual o superior al 33%.

BEQUES COMEDOR Y ATENCIÓN TEMPRANA

A lo último, la Xunta Rectora aprobó tamién, col únicu votu en contra de FORO, la convocatoria de beques comedor y d’atención temprana, con o ensin almuerzu, pal cursu 2020/2021, dirixida namá a aquellos menores que nun hayan tao becaos mientres el cursu 2019/2020.

El total de les ayudes aprobaes xube a 2.983.071’63 euros; 867.139’61 euros de la nueva convocatoria de beques comedor, atención temprana y conciliación; 629.818’33 euros pa la prórroga de beques comedor y atención temprana de setiembre a payares de 2020; y 1.486.113’49 euros pa beques comedor y atención temprana d’avientu de 2020 a xunu de 2021.

Les solicitúes van poder presentase por rexistru electrónicu (canal preferente) o de manera presencial, al traviés de cita previa. El plazu de presentación va ser de 20 díes naturales, a cuntar dende a otru día al de la publicación de la convocatoria nel BOPA

  Categories: