CCOO denuncia l’amenorgamientu nun terciu de les places d’asturianu

CCOO denuncia l’amenorgamientu nun terciu de les places d’asturianu
06 xunetu 00:18 2018 Imprimir

El Sindicatu d’Enseñanza de CCOO d’Asturies vieno acabante criticar esti xueves l’amenorgamientu inxustificáu d’hores d’asturianu pal próximu cursu na previsión docente darréu que la estimación de la Conseyería dende datos provisionales plantega una rebaxa de les places a xornada completa de casi un terciu.

El Sindicatu d’Enseñanza de CCOO d’Asturies recibió nos últimos díes delles quexes formulaes por docentes y equipos directivos de distintos centros educativos en rellación cola previsión de places vacantes de Llingua Asturiana pal cusu 2018/2019. Acordies colos datos recoyíos pol sindicatu, el númberu de places a xornada completa a les que va poder optar el profesoráu interino d’esta asignatura na próxima axudicación desciende casi nun terciu con respectu al cursu actual. Siguiendo la tendencia de los últimos años, munches de les places completes esistentes esti cursu contémplense na previsión de necesidaes docentes como medies xornaes, sigún dexa afitao esti sindicatu nuna nota de prensa asoleyada’l xueves.

La rebaxa nel cálculu d’hores de Llingua Asturiana en bien de casos nun coincide coles estimaciones realizaes nos centros educativos, sigún el sindicatu: “Nos colexos públicos onde se da asturianu n’Educación Infantil, nun se tuvieron en cuenta les horas d’esta etapa. Tampoco nun se respetó’l criteriu de los equipos directivos que pidíen el caltenimientu d’una plaza completa de Llingua Asturiana col envís de cubrir delles necesidaes del centru. Ye’l casu del CRA de La Espina, onde la docente d’esta asignatura vien realizando funciones de coordinación. D’otru llau, el cálculu de necesidaes de los institutos básase nes hores de la ESO, descartando la posibilidá de que la materia puedan escoyela estudiantes de Bachilleratu. P’acabar, en dellos centros, como’l CEPA d’Uviéu, axúntase al alumnáu de niveles estremaos, reduciendo’l númberu d’hores llectives asignaes a la materia”.

Na nota de prensa asoleyada esti día, CCOO camienta que “too apunta hacia una planificación fecha, a partir de datos provisionales, con criterios economicistes, que rebaxa les espectatives de matrícula de los centros col aquel d’acomodar la previsión de necesidaes docentes a contratos a tiempu parcial. N’algún casu, como l’IES de Tinéu, estremáronse les hores d’asturianu en dos medies xornaes, ampliándose una d’elles a xornada completa col amiestu d’hores de Llingua Castellana”.

La práctica habitual de realizar axustes, ampliando les hores de trabayu, depués d’empezar el cursu, “empeora tovía más les condiciones llaborales de los docentes de Llingua Asturiana, un colectivu formáu mayoritariamente por profesoráu interino que davezu se ve obligáu a solicitar el so puestu trabayu sin saber cuál va ser el númberu real d’hores llectives qu’habrá dar, lo que tien consecuencies patentes sobre’l salariu. Esta situación ye inda más grave pola falta de reconocimientu de la especialidá de Llingua Asturiana y Lliteratura, qu’impide al profesoráu de la materia algamar la condición de funcionarios”.

Los criterios de planificación descritos tamién afecten al derechu del alumnáu a recibir voluntariamente enseñances d’asturianu y gallego-asturianu, como diz la Llei 1/1998, darréu que provoca qu’en dellos centros la planificación se faiga en función de los recursos previstos, inorando les demandes de les families.

CCOO reclama a la Conseyería d’Educación que la previsión de necesidaes docentes se faiga a partir de datos reales, faciendo un sondéu de matrícula enantes de terminar el cursu, pa evitar los perxuicios que se vienen causando al profesoráu interino de Llingua Asturiana, garantizando, al mesmu tiempu, el derechu del alumnáu a estudiar la materia en tolos niveles de la enseñanza reglada.

  Categories:
Loading Facebook Comments ...