Cascos retruca firme a tolos pronósticos y arrasa n’Asturies

Foro Asturies, el partíu lideráu por Francisco Álvarez-Cascos, desanició ayeri toles encuestes que falaben del caltenimientu del PSOE nel escenariu rexonal, algamando una victoria nes urnes impensable dos meses enantes y poniendo na so mano’l Gobiernu autonómicu. La izquierda quedó abondo alloñada de los 23 escaños que dan la mayoría absoluta y el PP, pela so parte, sufrió un escalabru dafechu al pasar de los 20 diputaos con que cuntaba hasta agora a namái que 10.

Los principales cabezaleros del PP, la candidata, Isabel Pérez-Espinosa, y l’alcalde d’Uviéu, Gabino de Lorenzo, abrieron darréu la puerta, una vegada conocíos los datos, a un entendimientu con Foru que convierta a Cascos en presidente.

Foro Asturies pasa con estos resultaos a convertise nel principal partíu del arcu parlamentariu con 177.588 votos, lo que-y dexa sumar 16 escaños. Estos diputaos dexen a Álvarez-Cascos como candidatu direutu a ocupar el edificiu presidencial de la cai Suárez de la Riva, por cuenta d’algamar dalgún tipu d’alcuerdu col Partíu Popular, ya inclusu ensin esi alcuerdu al ser la fuerza más votada.

La cayida del PSOE, que foi xeneralizada en toa España, amenorgó na rexón nel casu de les elecciones locales. Sicasí, los socialistes caltienen la mayor parte del poder municipal, pero sufren perdes bien sensibles, sobremanera la de la mayor ciudá del Principáu, Xixón, onde fueron el partíu más votáu pero la suma de Foru y PP tien la mayoría absoluta, con ventaya pa llograr l’Alcaldía pa la candidata del partíu de Cascos, Carmen Moriyón, que llogró nueve conceyales, por cinco de la popular Pilar Fernández Pardo, que sufrió tamién un duru cstigu.

El PSOE pierde tamién Mieres en favor d’IX, que dobló en conceyales a los socialistes. Izquierda Xunida tien mayoría tamién en L.lena, onde repetirá alcaldía, en Castrillón ya Illas, onde ya gobernaba, y en Cangas del Narcea onde quedó penrriba de PP y PSOE.

N’Uviéu, Gabino de Lorenzo perdió la mayoría absoluta pero’l rexidor uvieín compareció na nueche electoral abriendo les puertes a un alcuerdu con Foro Asturias que, nel so casu, dexaría-y caltener el cayáu de mandu. Avilés, onde podrá reeditase el pactu ente les fuerces de la esquierda, ye agora la principal plaza municipal pa los socialistes, qu’amás podríen recuperar l’Alcaldía de Siero si son capaces de reeditar el pactu múltiple que suscribieron va cuatro años, magar paez más futurible que pacten FAC y PP colos dos conceyales del Partíu de La Fresneda y gobierne darréu FAC.

El PSOE algamó la mayoría absoluta en 28 de los 78 conceyos asturianos y venció con mayoría simple n’otros 25.

Los resultaos nacionalistes foron curtios y Bloque-UNA nun pudo algamar tan siquier el 1%, lo mesmo qu’asocedió cola coalición PAS-URAS que desapaez del panorama políticu práuticamente. Bloque-UNA algamó en toa Asturies 5.460 votos, un 0,91%, y URAS-PAS 3.023 votos y un 0,50%. Les dos coaliciones llograron dos conceyales caúna.

UPyD tamién quedó llloñe d’algamar el diputau que se-y pronosticaba y como IDEAS viéronse perxudicaos pola mareona que xurdió de la candidatura de Cascos.