Bárbara vuelve a los IES d’Avilés acompañada por dos nuevos amigos

Llámense Álex y Noah, y fueron escurríos teniendo en cuenta les duldes y suxerencies recoyíes poles Antenes Informatives nos centros, al traviés de los Puntos Moraos instalaos dende febreru dientro del programa de prevención d’agresiones sexistes impulsáu pola conceyalía de Mocedá.

La conceyala de Mocedá, Raquel Ruiz, anunció esti martes les novedaes que col nuevu cursu escolar va presentar el personaxe Bárbara, creáu coles mires de promover valores positivos en materia d’igualdá ente la mocedá avilesina. Esti personaxe ye l’elementu central del programa de prevención d’agresiones sexistes n’espacios d’ociu y tiempu llibre empobináu al alumnáu de los centros d’Educación Secundaria de la ciudá, desenvueltu polos y les moces qu’exercen nos mesmos el papel d’Antenes Informatives.

Al personaxe de Bárbara, qu’esperimenta dellos cambeos na so vestimienta, acompañaránlu dende agora dos nuevos amigos: Álex y Noah. Dambos fueron configuraos teniendo en cuenta les demandes, duldes y suxerencies recoyíes poles Antenes Informatives nos cinco institutos de la ciudá, al traviés de los Puntos Moraos instalaos dende’l mes de febreru.

Por aciu estos nuevos personaxes, el serviciu de Mocedá busca ufiertar dos referentes más no que fai a relaciones sociales y afeutives saludables. Bárbara describe a Álex como xuna chica a la que-y gusta salir de fiesta, pero controla y nun se dexa llevar por naide”, que ta “bien segura de sigo mesma” y esfruta con aficiones como los videoxuegos o’l fútbol. Comparte con Bárbara l’amor polos animales.

Pela so parte, Noah ye un mozu “bien comprometíu colos movimientos sociales”, que se declara feminista y “ye bien consciente de la discriminación que sufrimos les muyeres”. Noah ye aficionáu a la música y “conoz a tolos grupos de la ciudá”, siendo amás un llector empederníu que participa nel Club de Llectura. Dambos personaxes van acompañar d’equí p’arriba a Bárbara en toles actividaes empobinaes a la mocedá nes qu’ésta participe apurriendo perspectiva de xéneru.

El pasáu mes de febreru púnxose en marcha’l proyectu Puntu Moráu en tolos Institutos d’Educación Secundaria de la ciudá. Ye un espaciu atendíu poles Antenes Informatives del Serviciu de Mocedá que desenvuelven el so llabor mientres los recreos y onde, al traviés de buzones recueyen, de manera totalmente anónima, toles duldes y aclaraciones que l’alumnáu del centru precise énte agresiones sexistes o cualesquier otru tipu de incomodidades que puedan sufrir nos sos espacios d’ociu y tiempu llibre.

Dende la puesta en marcha de los Puntos Moraos y hasta les vacaciones de branu, les Antenes Informatives axuntáronse cada llunes nel Edificiu Fueru pa clasificar les demandes recoyíes nos Puntos Moraos y, con ayuda de personal especializáu, ellaborar les respuestes fayadices. Estes fueron unviaes a les y los mozos al traviés del perfil en Facebook de Bárbara (fb.com/avilesconbarbara) pa respetar l’anonimatu y confidencialidad de les y los demandantes.