Xuristes pol Asturianu denuncia a los gobiernos asturianu y español énte’l Conseyu d’Europa

Por mor de la Selmana de les Lletres Asturianes, l’Aconceyamientu de Xuristes pol Asturianu unvió un comunicáu nel que quieren “amosar la braera cara que los gobiernos español y asturianu-y ponen, per cincuenta y un selmanes al añu, a la llingua de nós: la represiva”.

La iniciativa, que faen cada añu, consiste n’unviar un informe-denuncia escontra l’Estáu español énte’l Conseyu d’Europa, y esti añu ye’l cuartu de los mandaos.

Según informen nel comunicáu nel informe-denuncia atropense 95 normes, empobinaes, pal AXA, “al desaniciu del asturianu y, asina, contraries dafechu a les disposiciones de la Carta Europea de les Llingües Rexonales o Minoritaries”.

La discriminación llegal del asturianu, espliquen dende AXA, “dase n’ estayes tan estremaes como’l desendolcu sostenible medioambiental; la educación infantil y profesional, el bachilleratu y la formación del profesoráu; na carrera fiscal y nel tratu nos tribunales de xusticia; na espublización de les normes; nel Nomenclátor Xeográficu Básicu d’España; énte l’Axencia Estatal d’Alministración Tributaria; nes rellaciones coles fuerces armaes y obligaciones de la Guardia Civil; na producción y distribución inematográfica; na sociedá de la información; o nel Sistema Arbitral de Consumu”, ente otres munches.