Xixón entama a cumplir la llei nel usu de la toponimia oficial

L’alcaldesa de Xixón, Paz Fernández Felgueroso, emitió esti dia una orde pola que da un plazu máximu d’un añu a los técnicos y políticos municipales pa qu’entainen na aplicación real de los topónimos oficiales de Xixón, qu’hasta agora vien siendo mui escasa, como denunciaba’l Partíu Popular xixonés apocayá na Xunta Rectora de la Fundación Municipal de Cultura y al traviés del so representante, l’asturianista Humberto Gonzali, amás de con un comunicáu que se convertía nel primer redactáu n’asturianu pol Partíu Popular de Xixón.

L’alcaldesa firmó una instrucción na que reclama a los servicios muncipales que tengan al so cargu la rotulación de cais y carreteres “deben adecuar nel plazu de 12 meses les rotulaciones a les denomaciones oficiales”. La orde faise estensiva a los planos oficiales y a la páxina web del conceyu. Amás, otra orde establez que tolos servicios municipales tienen d’usar les denomaciones oficiales nos documentos y espedientes alministrativos municipales. La tercer disposición impón a la unidá d’integración corporativa’l llabor d’información sobre cualesquier dulda que xurda nel procesu.

Con esta midida paez que va solucionase’l problema d’incumplimentu de la llei que venía dándose en Xixón, dende que’l 4 d’ochobre de 2006 s’espublizaren los topónimos oficiales nel BOPA.

El PP xixonés denuncia la política llingüística que se fai nel consistoriu