Xixón anicia los conciertos de la so Selmana Grande con Raimundo Amador como novedá d’última hora

Xixón abre una selmana de música en sesión continua. Con Raimundo Amador como incorporación d’última hora pa suplir la cayida’l cartel, el 13 d’agostu, d’Isaac Delgado, l’arxentín Kevin Johansen inagura esta nueche nueve díes de conciertos desdoblaos na Plaza Mayor y la playa de Poniente, escenarios polos que pasarán Hamlet, Marina Heredia, El Bicho, Chenoa, SFDK, Los Berrones y David Civera.

Clasificáu a sigo mesmu como ‘desxeneráu’ pola imposibilidá d’adscribilu a un xéneru musical concretu, Kevin Johansen espardirá güei na Plaza Mayor de Xixón los temes de los sos dos trabayos editaos ‘The Nada’ y ‘Sur o no Sur’, éxitos n’Arxentina pola so mecigaya d’idiomes, testos y sentíu l’humor.

Mañana, sábadu, ‘Gospel sans frontieres’ estrenarán l’escenariu de la playa de Poniente y dexarán el más tradicional allugamientu énte l’Ayuntamientu pal Festival Nacional de Gaites ‘Villa de Xixón’. El fin de selmana completaráse coles actuaciones, el domingu, de Laura Simo, creadora d’un espectáculu musical que rinde tributu al cine, y Marcos Valle, compositor brasileñu enfotáu en redefinir la bossanova.

El llunes sedrá’l turnu pa la intérprete flamenca Marina Heredia, mientres la banda Hamlet s’adueña del escenariu de Poniente. A él xubiránse el martes 10 los integrantes del grupu Los Berrones, que grabarán el so conciertu pa editar na seronda un discu-dvd recopilatoriu. Antibalas Afrobeat Orchestra pondrá’l contrapuntu étnicu na Plaza Mayor.

El miércoles actuarán Chenoa -Poniente- y la fadista Joana Amendoeira -plaza l’Ayuntamientu-, mientres que’l xueves garrarán el relevu la banda de fusión El Bicho y los raperos SFDK. Pal vienres 13 fíxase’l conciertu del guitarrista andaluz Raimundo Amador, pioneru na modernización del flamencu hacia’l rock y últimu intérprete en pasar pola Selmana Grande antes de la nueche de los fuegos artificiales.

El pieslle de les fiestes, depués del baille de la dancia prima y del ‘restallón’, pondrálu na playa de Poniente el cantante David Civera.