‘Cultura pal Arango’ espera acceder al teatru pa comprobar el so estáu antes de setiembre

Antes de fin de mes. Los miembros de la plataforma ‘Cultura pal Arango’, que reclamen la recuperación y remocicamientu d’esi teatru xixonés pa usu artísticu autoxestionáu, esperen poder acceder al inmueble nes prósimes selmanes pa facer les mediciones que llueu-y treslladarán al Ayuntamientu, col envís de cuantificar la inversión que se requier pa recuperar la sala.

Los integrantes del collectivu ciudadanu, que s’oponen al proyectu de conversión del Arango nuna macroclínica estética, cellebraron ayeri una nueva asamblea pública a les puertes del teatru na qu’informaron de que negocien colos poseedores de les llaves del inmueble p’acceder al recintu.

La plataforma anunció asinamesmo el so determín de siguir faciendo asamblees énte l’Arango tolos xueves que queden del mes d’agostu, y almitió la posibilidá d’un retrasu nel accesu al teatru por mor de la cellebración de la Selmana Grande de Xixón.