El Principáu escueye Madrid pa la primer cellebración oficial itinerante del Día d’Asturies nel esterior

Madrid estrenará la llista. El Gobiernu autonómicu escoyó esa ciudá pa cellebrar los actos de la primer conmemoración oficial itinerante del Día d’Asturies nel esterior, festividá que tien llugar el 8 de setiembre pero que la comunidá asturiana en Madrid festexará el 18 y el 19 d’esi mesmu mes, con presencia de miembros del Executivu’l Principáu.

Según confirmó’l director de l’Axencia Asturiana d’Emigración, Luis Miguel Fernández Romero, el programa de cellebraciones entá nun ta dafechu definíu, pero ye segura la participación de representantes del Gobiernu autonómicu na folixa oficial de Madrid, que se retrasa pa mediaos de setiembre al nun ser festivu nesa comunidá el 8 de setiembre.

El conseyeru de Xusticia, Seguridá Pública y Relaciones Esteriores, Francisco Javier García Valledor, anunció’l pasáu 3 de xunu n’Uviéu l’envís del Gobiernu’l Principáu d’entamar una cellebración adicional y rotativa del Día d’Asturies nel esterior a partir d’esta prósima edición, cola idea de que cada añu seya una ciudá distinta la qu’acueya los actos conmemorativos, pa facilitar la participación de los asturianos emigraos a mui estremaos llugares.

Madrid acueye la principal colonia d’emigrantes asturianos nel esterior y mantién en funcionamientu dos grandes collectivos enfotaos en caltener viva l’asturianía la capital del Estáu: el Centru Asturianu de Madrid y la más reciente Asociación Cultural y Recreativa Asturianos en Madrid.