Vuelven los autocines en toa España pol coronavirus

Vuelven los autocines en toa España y en tol mundu pol coronavirus y el de Xixón dexará de ser una de les esceiciones estatales d’un modelu d’averase al sétimu arte qu’espolleta en tolos continentes.

Talamente como se confirma n’Alemaña, Corea del Sur o hasta la República Islámica d’Irán, resulta qu’esta ye xustamente la forma de ver cine que más sentíu tien pa quien nun se conformen cola tele y echen de menos la gran pantalla; para aquellos qu’estrañen “dir al cine” pero quieren la mayor protección posible frente al virus que nos ta robando la vida.

N’España, l’Autocine Madrid RACE –abiertu va trés años al calor de la moda Vintage– namá espera la entrada de la ciudá na fase I para reabrir el negociu “con más mires que nunca”. Y lo mesmo quepe esperar nos trés recintos esistentes na Comunidad Valenciana, el de Getxo y el de Xixón. La empresa que xestiona’l de Madrid, de les granadines Cris Porta y Tamara Istambul, preve abrir unu más en Málaga y tienen “planes” para otru en Barcelona.